కింగ్ ఫిషర్ అధినేత మరియు రాజ్యసభ సభ్యుడు విజయ్ మాల్యా దేశంలో వివిధ బ్యాంకులకు రూ.9,000 కోట్లు బకాయిలు చెల్లించవలసి ఉంది. బ్యాంకుల నుండి అప్పులు తీర్చమని ఒత్తిడి పెరిగిపోవడం ఈనెల 2వ తేదీన ఆయన లండన్ వెళ్ళిపోయారు. దీనిపై పార్లమెంటులో కూడా నిన్న చర్చ జరిగింది. అలాగే సుప్రీం కోర్టులో కూడా విచారణ జరిగింది. రెండు వారలలోగా తమ ముందు హాజరు కావాలని ఆదేశిస్తూ సుప్రీం కోర్టు ఆయనకు నోటీసు జారీ చేసింది. ఆయనకు బ్యాంకులు కూడా నోటీసులు జారీ చేయడానికి అనుమతించింది.

ఈ పరిణామాలపై లండన్ లో ఉన్న విజయ్ మాల్యా చాలా ఘాటుగా స్పందిస్తూ ట్వీటర్ లో ఈరోజు రెండు మెసేజులు పెట్టారు. “నేను ఒక అంతర్జాతీయ వ్యాపారవేత్తని కనుక తరచూ విదేశాలకు వెళ్లి వస్తుంటాను. నేనేమీ దేశం విడిచిపారిపోలేదు…పోలీసులను నుంచి తప్పించుకొని తిరగడం లేదు. ఒక ఎంపిగా భారతదేశ చట్టాలను, న్యాయవ్యవస్థలకు లోబడి ఉంటాను వాటిని గౌరవిస్తాను. మన న్యాయవ్యవస్థపై నాకు అపారమయిన నమ్మకం ఉంది. అయితే నా గురించి దేశంలో మీడియా విచారణ చేయడాన్ని అంగీకరించబోను,” అని ట్వీట్ చేసారు.

ఆయన మళ్ళీ భారత్ తిరిగి వస్తారో లేదో, వచ్చి బ్యాంకుల అప్పులను తీరుస్తారో లేదో తెలియదు కానీ ఆయన భారత్ చట్టాలకు, న్యాయవ్యవస్థకు లోబడి ఉంటానని చెప్పడమే గొప్ప విషయం. ఇటువంటి పెద్ద మనుషులు బ్యాంకులకు వెల కోట్లు టోపీలు పెడుతుంటే, వారితో రాజకీయ పార్టీలకు ఉండే ఆర్ధిక, రాజకీయ అవసరాలను దృష్టిలో ఉంచుకొని ప్రభుత్వాలు ఉపేక్షిస్తుంటే, చివరికి ఆ భారం కూడా బ్యాంక్ ఖాతలు లేని సామాన్య ప్రజలపైన కూడా పడుతోంది. నిజామాబాద్ ఎంపి కవిత నిన్న లోక్ సభ సభలో మాట్లాడుతూ విజయ్ మాల్యా విషయం ప్రస్తావించి, ఆయన బ్యాంకులను మోసం చేసి విదేశాలకు పారిపోతుంటే మోడీ ప్రభుత్వం ఎందుకు చూస్తూ ఊరుకొందని ప్రశ్నించారు. ఆమె ప్రశ్న ప్రజాభిప్రాయానికి అద్దం పడుతోంది.