‘సైంధ‌వ్‌’ త‌ర‌వాత వెంకీ సినిమా ఏదీ బ‌య‌ట‌కు రాలేదు. కాక‌పోతే ఆయ‌న చేతినిండా ప్రాజెక్టులు ఉన్నాయి. ‘రానా నాయుడు సీజ‌న్ 2’కు సంబంధించిన చిత్రీక‌ర‌ణ పూర్తి చేశారు వెంకీ. అనిల్ రావిపూడి ద‌ర్శ‌క‌త్వంలో ఓ సినిమా చేయాల్సివుంది. అది త్వ‌ర‌లోనే ప‌ట్టాలెక్కుతుంది. ఈ సినిమాలో మ‌రో హీరో కూడా క‌నిపించ‌నున్నాడ‌ని ప్ర‌చారం జ‌రుగుతోంది. 2025 సంక్రాంతికి ఈ చిత్రం ప్రేక్ష‌కుల ముందుకు రానుంది. ఈలోగా మ‌రో కొత్త ద‌ర్శ‌కుడి క‌థ‌కూ వెంకీ ఓకే చెప్పార‌ని ఇన్ సైడ్ వ‌ర్గాల టాక్‌.

‘సామ‌జ‌వ‌ర‌గ‌మ‌న’ చిత్రం కోసం రైటింగ్ డిపార్ట్మెంట్ లో ప‌ని చేశారు నందు. ఆయ‌న వెంకీ కోసం ఓ క‌థ సిద్ధం చేసుకోవ‌డం, అది కాస్త వెంకీ వ‌ర‌కూ వెళ్ల‌డం జ‌రిగాయ‌ని స‌మాచారం. ఈ క‌థ వెంకీకి బాగా న‌చ్చింద‌ని, అందుకే వెంట‌నే గ్రీన్ సిగ్న‌ల్ ఇచ్చాడ‌ని తెలుస్తోంది. వెంకీ స్టైల్ లో స‌ర‌దాగా సాగిపోయే ఫ్యామిలీ ఎంట‌ర్‌టైన‌ర్ ఈ సినిమా అని టాక్‌. రావిపూడి సినిమా పూర్త‌యిన వెంట‌నే నందు సినిమాని ప‌ట్టాలెక్కించే అవ‌కాశం ఉంది. పూర్తి వివ‌రాలు త్వ‌ర‌లో వెల్ల‌డ‌వుతాయి.