కేసీఆర్ రాజకీయం ప్రాంతీయ వాదం మీద ఉంటుంది. తెలంగాణ వాదంతో ప్రజల్ని ఏకం చేయగలిగారు. ఇప్పుడు అదంతా ఆవిరైపోయింది. బీఆర్ఎస్ కరిగిపోతోంది. ఇప్పుడు నిలబడాలంటే మరోసారి అదే వ్యూహం పాటించాలని డిసైడయినట్లుగా కనిపిస్తోంది. ఉత్తర, దక్షిణ తెలంగాణల నినాదాన్ని మెల్లగా ప్రజల్లోకి తీసుకెళ్లేందుకు ప్రయత్నిస్తోంది. ఉత్తర తెలంగాణపై వివక్ష చూపిస్తున్నారని బీఆర్ఎస్ సొంత మీడియాలో పేజీలకు పేజీలు రాయడం ప్రారంభించారు.
రాజకీయంగా కీలక పదవులన్నీ అంటే ముఖ్యమంత్రి, ఉప ముఖ్యమంత్రి, స్పీకర్‌ వంటి కీలక పదవులు, కీలక శాఖలు దక్షిణ తెలంగాణకు చెందిన నాయకులకే దక్కాయిని బీఆర్ఎస్ నేతలు ప్రచారం ప్రారంభించారు. అదే సమయంలో ఉత్తర తెలంగాణలోని ఆదిలాబాద్‌, నిజామాబాద్‌తోపాటు రంగారెడ్డి, హైదరాబాద్‌ ఉమ్మడి జిల్లాలకు కూడా ఇప్పటివరకు ప్రాతినిధ్యమే లేకుండాపోయిందని చెబుతున్నారు. ఉమ్మడి రాష్ట్రంలోనూ, తెలంగాణ రాష్ట్రం ఏర్పడిన తర్వాత కేసీఆర్ కూడా ఉత్తర తెలంగాణకు పెద్ద పీట వేశారు. ఇప్పుడు మాత్రం అన్యాయం చేశారని అంటున్నారు.
ఇప్పుడు రాజకీయంగా అన్యాయం జరుగుతోందని ప్రారంభించి తర్వాత… కాళేశ్వరం వంటి వాటి ద్వారా ఇతర విషయాల్లోనూ రేవంత్ సర్కార్ నిర్లక్ష్యం చేస్తుందని ప్రజల్లోకి వెళ్లాలన్న ఆలోచనలో ఉన్నట్లుగా తెలుస్తోంది. ఇలా చేయడం ఉత్తర, దక్షిణతెలంగాణల మధ్య వివాదం తీసుకు రావడమేనని అది సొంతరాష్ట్రంలో చిచ్చు పెట్టినట్లుగా అవుతుందన్న భావన ఉన్నా.. బీఆర్ఎస్ మాత్రం ఇప్పటికిప్పుడు ఇంతకు మించిన దారి లేదన్న అభిప్రాయంలో ఉన్నట్లుగా కనిపిస్తోంది. ఒకప్పుడు ఉత్తర తెలంగాణ బీఆర్ఎస్ కంచుకోట. ఇప్పుడు బీటలు వారిపోయింది. అందుకే సెంటిమెంట్ రాజకీయాలు మళ్లీ తప్పవన్న ప్లాన్‌లో కొత్త రాజకీయాలు ప్రారంభించినట్లుగా కనిపిస్తోంది.
