తొలి సినిమాతోనే ‘ఉప్పెన‌’లా విరుచుకుప‌డింది కృతి శెట్టి. ఆ సినిమా సూప‌ర్ డూప‌ర్ హిట్ అవ్వ‌డంతో త‌న పేరు మార్మోగిపోయింది. ‘బంగార్రాజు’, `శ్యామ్ సింగ‌రాయ్‌` డీసెంట్ సినిమాలుగా నిలిచాయి. అయితే ఆ త‌ర‌వాత ఆమె ట్రాక్ త‌ప్పిపోయింది. ఒక్క‌టంటే ఒక్క హిట్ కూడా ద‌క్కలేదు. అన్నీ డిజాస్ట‌ర్లే. ఇటీవ‌ల వ‌చ్చిన ‘మ‌న‌మే’ కూడా ఆమెను నిరాశ ప‌రిచింది. ఈ సినిమాతో కృతి ఫామ్ లోకి వ‌స్తుంద‌ని అంతా ఆశించారు. కానీ అలాంటిదేం జ‌ర‌గ‌లేదు. ఈ ఫ్లాపుతో కృతి శెట్టి కెరీర్ గంద‌ర‌గోళంలో ప‌డిపోయింది. కాక‌పోతే… ఇప్పుడు మ‌రో మంచి ఆఫ‌ర్ కృతిని వెదుక్కొంటూ వ‌చ్చింది.

దుల్క‌ర్ సల్మాన్ హీరోగా సెల్వ‌రాజ్ ద‌ర్శ‌క‌త్వంలో ఓ చిత్రం రూపుదిద్దుకోనుంది. రానా నిర్మాత‌గా వ్య‌వ‌హ‌రిస్తుండ‌డం విశేషం. ఈ చిత్రంలో క‌థానాయిక‌గా కృతిని ఎంచుకొన్న‌ట్టు తెలుస్తోంది. దుల్క‌ర్‌తో జోడీ క‌ట్ట‌డం కృతికి ఇదే తొలిసారి. ఈ అవ‌కాశం గ‌నుక నిజంగానే కృతి ప‌రం అయితే, అది వ‌ర‌మే అనుకోవాలి. ఎందుకంటే… సెల్వ‌రాజ్ త‌న క‌థానాయిక‌ల పాత్ర‌ల్ని అందంగా, అర్థ‌వంతంగా తీర్చిదిద్దుతాడు. అందులోనూ దుల్క‌ర్ పాన్ ఇండియా హీరో. సినిమా హిట్ట‌యితే అన్ని భాష‌ల్లోనూ మంచి పేరు వ‌స్తుంది. ఈ అవ‌కాశం… కృతి నిల‌బెట్టుకొంటే, హిట్ సినిమా పడ‌లేద‌న్న బెంగ తీరిపోతుంది. దుల్క‌ర్ ఇటీవ‌లే ‘క‌ల్కి’లో ఓ కీల‌క పాత్ర పోషించిన సంగ‌తి తెలిసిందే. ప్రస్తుతం తాను హీరోగా రూపొందుతున్న ‘ల‌క్కీ భాస్క‌ర్‌’ విడుద‌ల‌కు స‌మాయాత్తం అయ్యింది. ఈ సినిమా త‌ర‌వాతే సెల్వ‌రాజ్ ప్రాజెక్ట్ ప‌ట్టాలెక్కుతుంది.