గేమ్ ఛేంజ‌ర్ ఎప్పుడు? ఇది మిలియ‌న్ డాల‌ర్ల ప్ర‌శ్న‌. రామ్ చ‌ర‌ణ్ అభిమానులు ఈ సినిమా గురించి ఎప్ప‌టి నుంచో ఎదురు చూస్తున్నారు. దిల్ రాజుని ఎప్పుడు రిలీజ్ డేట్ గురించి అడిగినా… ‘అంతా శంక‌ర్ చేతుల్లోనే ఉంది’ అంటుంటారు. ఇప్పుడు ఈ ప్ర‌శ్న నేరుగా శంక‌ర్‌కే ఎదురైంది. గేమ్ ఛేంజ‌ర్ ఎప్పుడు? ఈ యేడాది వ‌స్తుందా, రాదా? అని.

‘భార‌తీయుడు 2’ ప్ర‌మోష‌న్ల‌లో శంక‌ర్ బిజీగా గ‌డిపేస్తున్నారు. నిన్న హైద‌రాబాద్ లో ప్రీ రిలీజ్ ఈవెంట్ జ‌రిగింది. ఈరోజు మ‌రో ప్రెస్ మీట్ పెట్టారు. ఈ సంద‌ర్భంగా ‘గేమ్ ఛేంజ‌ర్‌’ ప్ర‌స్తావ‌న వ‌చ్చింది. ఈ సినిమాని ఎప్పుడు రిలీజ్ చేస్తారు? అనే ప్రశ్న శంక‌ర్‌కు ఎదురైంది. అయితే శంక‌ర్ మాత్రం క్లారిటీగా ఆన్స‌ర్ చెప్ప‌లేదు. ”ఈ సినిమాకు సంబంధించి చ‌ర‌ణ్ పోర్ష‌న్ పూర్త‌య్యింది. మ‌రో ప‌ది, ప‌దిహేను రోజుల షూటింగ్ బాకీ ఉంది. ఆ త‌ర‌వాత ఎడిటింగ్, పోస్ట్ ప్రొడ‌క్ష‌న్ వ‌ర్క్ ఉంది. అవ‌న్నీ అయితే కానీ ఓ స్ప‌ష్ట‌త రాదు” అనేశారు. దాంతో ‘గేమ్ ఛేంజ‌ర్‌’ ఎప్పుడు అనే ప్ర‌శ్న‌కు శంక‌ర్ ద‌గ్గ‌ర కూడా స‌మాధానం లేకుండా పోయింది. ఈ నెలంతా `భార‌తీయుడు 2` హ్యాంగోవ‌ర్‌లోనే ఉంటాడు శంక‌ర్‌. ఆగ‌స్టు మొత్తం ‘గేమ్ ఛేంజ‌ర్‌’ కోసం కేటాయిస్తే త‌ప్ప‌.. సినిమా పూర్తి అవ్వ‌దు. ఆ త‌ర‌వాత ప్రీ ప్రొడక్ష‌న్స్ కోసం క‌నీసం రెండు నెల‌లైనా ప‌డుతుంది. ఈ లెక్క‌ల‌న్నీ చూస్తే ‘గేమ్ ఛేంజ‌ర్’ ఈ యేడాది రావ‌డం డౌటుగానే ఉంది.