ప్ర‌స్తుతం అనిల్ రావిపూడితో ఓ సినిమా చేస్తున్నాడు వెంక‌టేష్‌. క్రైమ్ జోన‌ర్‌లో న‌డిచే ఈ క‌థ‌లో మీనాక్షి చౌద‌రి, ఐశ్వ‌ర్య రాజేష్ క‌థానాయికలు. ఈ సంక్రాంతికి ఈ చిత్రాన్ని ప్రేక్ష‌కుల ముందుకు తీసుకొస్తారు. ఈలోగా వెంకీ మ‌రో సినిమాకు ప‌చ్చ జెండా ఊపారు. ‘సామ‌జ‌వ‌ర‌గ‌మ‌న’ సినిమాతో ర‌చ‌యిత‌గా గుర్తింపు తెచ్చుకొన్న నందు క‌థ‌కు వెంకీ ఓకే చెప్పారు. చిట్టూరి శ్రీ‌నివాస్ ఈ చిత్రానికి నిర్మాత. ఇదో ఫ్యామిలీ ఎంట‌ర్‌టైన‌ర్‌. ఈ ద‌స‌రాకు లాంఛ‌నంగా క్లాప్ కొడ‌తారు. 2025 వేస‌విలో ప్రేక్ష‌కుల ముందుకు తీసుకొచ్చే అవ‌కాశాలు ఉన్నాయి. ఈ చిత్రంలో క‌థానాయిక‌గా త్రిష‌ని ఎంచుకొన్న‌ట్టు తెలుస్తోంది. అనిల్ రావిపూడి సినిమా కోసం త్రిష‌ని సంప్ర‌దించారు. అయితే అప్ప‌టి బిజీ షెడ్యూల్స్ వ‌ల్ల త్రిష ‘ఓకే’ చెప్ప‌లేక‌పోయింది. ఈసారి మాత్రం వెంకీతో జోడీ క‌ట్ట‌డానికి రెడీ అయ్యింద‌ని తెలుస్తోంది.
‘ఆడ‌వారి మాట‌ల‌కు అర్థాలే వేరులే’, ‘న‌మో వెంక‌టేశ’ చిత్రాల‌లో వెంకీ, త్రిష‌లు జోడీగా క‌నిపించారు. ‘ఆడ‌వారి..’ హిట్ అయితే, ‘న‌మో వెంక‌టేశ’ ఫ్లాప్ అయ్యింది. ఇది వీరి కాంబోలో హ్యాట్రిక్ సినిమా. త్రిష ఇప్ప‌టికే చిరంజీవి ‘విశ్వంభ‌ర’లో క‌థానాయిక‌గా న‌టిస్తున్న సంగతి తెలిసిందే. 2025 సంక్రాంతికి ‘విశ్వంభ‌ర’ ప్రేక్ష‌కుల ముందుకు రానుంది.
