ఒకే ఒక్క పొరపాటు వల్ల జరిగే నష్టాలను ఎంతో కాలం భరించాల్సి ఉంటుంది. అలాంటి పొరపాట్లు ఎంత కాస్ట్‌లీగా ఉంటాయో… ఇప్పుడు ఏపీని చూస్తే ఏర్థమవుతుంది. వైసీపీకి ఒక్క చాన్స్ ఇచ్చినందున ఐదేళ్ల పాటు ఏపీ పునాదుల్ని బలహీనం చేసేసింది ఆ పార్టీ. ఫలితంగా ప్రతి వ్యవస్థ నిర్వీర్యమైపోయింది. ఓ పద్దతి లేకుండా ప్రతీ రంగంలోనూ ఇష్టారాజ్యంగా మారిపోయింది. ఆ దుష్పరిణామాలు తీవ్రంగా బయటపడుతున్నాయి. విశాఖలో వరుస ఫార్మా ప్రమాదాలు ఆ నిర్లక్ష్య వైరస్ పాలన పాపమే.
పారిశ్రామిక భద్రతా వ్యవస్థ నిర్వీర్యం
జగన్ రెడ్డి హయాంలో పారిశ్రామిక భద్రతా వ్యవస్థ అనేదే లేకుండా పోయింది. ఎవరు కమిషన్లు ఇస్తే వారికి అనుమతులు ఇచ్చేశారు. ఇంకా చెప్పాలంటే… పై స్థాయిలో వారు చేస్తున్నారు కాబట్టి మేము చేస్తే తప్పేంటని కింది స్థాయి అధికారులు ప్రతీ దానికి విలువ కట్టి.. కంపెనీల్లో సేఫ్టీ నార్మ్స్ ప్రకారం చర్యలు తీసుకున్నారా లేదా అన్నది చూడటమే మానేశారు. ఫలితంగా యాజమాన్యాలు ఖర్చు తగ్గించుకునేందుకు రాజీపడటం ప్రారంభించారు. చివరికి అది అత్యంత ఘోరమైన ప్రమాదాలకు కారణం అవుతోంది.
ఎల్జీ పాలిమర్స్ ఘటనతో జాగ్రత్తపడాలి…కానీ వసూళ్లుకు వాడుకున్నారు !
జగన్ సీఎం అయ్యాక ఎల్జీ పాలిమర్స్ ఘటన జరిగింది. ఈ ఘటన జరిగిన తర్వాత ప్రభుత్వం జాగ్రత్త పడాలి. కానీ జగన్ రెడ్డి సమీక్షల పేరుతో హడావుడి చేశారు. ప్రతి పరిశ్రమలోనూ సేఫ్టీ అడిట్ అని ప్రకటనలు చేశారు. ఎక్కడైనా చేశారా అంటే… ఆ పేరుతో ప్రతి పరిశ్రమ నుంచి అనధికారి వసూళ్లు అయితే చేసుకున్నారు. అంటే ఓ విషాదాన్ని బూచి చూపి డబ్బులు దండుకున్నారు కానీ.. ఆ పరిశ్రమలో రక్షణ వ్యవస్థలు బలంగా ఉన్నాయా లేదా.. కార్మికుల ప్రాణాలతో ఆడుకుంటున్నారా అన్న అంశాలను పరిశీలించలేదు.
వరుసగా బయటపడుతున్న దుష్ఫరిణామాలు
కంచే చేను మేసినట్లుగా వ్యవహరించిన వైసీపీ ప్రభుత్వ తీరు వల్ల ఇప్పుడు ప్రజలు నష్టపోతున్నారు. కార్మికులు ప్రాణాలు కోల్పోతున్నారు. వ్యవస్థ మొత్తం నిర్వీర్యం అయిపోయింది. ఫలితంగా ఒక్క విశాఖ ఫార్మా లోనే ఎన్నెన్ని ప్రమాదాలు జరుగుతున్నాయో చెప్పాల్సిన పని లేదు. ఇప్పుడు వ్యవస్థను మళ్లీ కింది స్థాయి నుంచి బలోపేతం చేసుకుంటూ రావాలి. అప్పుడు మాత్రమే మళ్లీ వ్యవస్థలు బాగుపడతాయి.. ప్రజలకు రక్షణ దొరుకుతుంది.
