చిన్న సినిమాల టీజర్, ట్రైలర్స్ పెద్ద హీరోలు లాంచ్ చేసి ఎంతో కొంత ప్రమోషన్స్ లో భాగం కావడం కామన్. ‘ట్రైలర్ బావుంది. అందరూ సినిమా చూసి సపోర్ట్ చేయండి’ అని తమవంతు మాట సాయం చేస్తుంటారు పెద్దహీరోలు. తాజాగా మత్తువదలరా 2 ట్రైలర్ ని ప్రభాస్ లాంచ్ చేశారు. అయితే ఈ లాంచ్ ఎదో రొటీన్ అన్నట్టు జగరలేదు. కొంచెం క్రియేటివ్ గా అలోచించారు. ఒక చిన్న స్కిట్ లా చేశారు. ఇందులో ప్రభాస్ బుజ్జిగాడు క్యారెక్టర్ ని గుర్తు చేసేలా కనిపించడం ఫ్యాన్స్ కి మంచి కిక్ ఇచ్చింది.

ట్రైలర్ లాంచ్ సందర్భంగా ప్రభాస్ ఆసువుగా పలికిన డైలాగులు కొన్ని భలే క్యాచిగా వున్నాయి. ఇప్పటికే చాలా మీమ్స్ పేజీలో వైరల్ అవుతున్నాయి. ”వీడ్ని బయటికెళ్ళి ఆడుకోమను’.. ”ఇదేంట్రా ఇంతుంది”.. ”ఈయాల్టికి ఇదొత్తదా”అని గోదారి డైలెక్ట్ డార్లింగ్ పలికిన కొన్ని డైలాగ్స్ మీమర్స్ కి మంచి స్టఫ్ గా దొరికాయి. మత్తువదలరా ట్రేడ్ మార్క్ ‘తస్కరించుట’ డైలాగ్ ని ప్రభాస్ చెప్పడం మరో హైలెట్. మొత్తానికి ప్రభాస్ ప్రజెన్స్ సినిమాకి మంచి హైప్ ఇచ్చింది. ప్ర‌భాస్ కామెడీ టైమింగ్ ని సినిమాల్లో చూసి చాలాకాల‌మైంది. బాహుబ‌లి, సాహో, రాధే శ్యామ్‌, స‌లార్‌… ఇలా వ‌రుస‌గా ప్ర‌భాస్ సీరియ‌స్ రోల్స్ లోనే క‌నిపించాడు. అయితే ‘రాజాసాబ్‌’తో ఈ ముచ్చ‌ట తీర‌బోతోంది. మారుతి ద‌ర్శ‌క‌త్వం వ‌హిస్తున్న సినిమా ఇది. మారుతి అంటేనే కామెడీ మార్క్‌! ప్ర‌భాస్ పాత్ర‌ని కూడా ‘బుజ్జిగాడు’ రేంజ్‌లో చూపించ‌బోతున్నాడు మారుతి. ఓర‌కంగా ప్ర‌భాస్ అభిమానులు ఆశిస్తోంది కూడా ఇదే.