కోలీవుడ్ స్టార్ హీరో విజయ్ తెలుగులో సత్తా చాటేందుకు ఎన్నిసార్లు ప్రయత్నించినా లాభం లేకుండా పోయింది. తుపాకి, జిల్లా పర్వాలేదనిపించుకున్నా మిగతా సినిమాలన్ని కనీసం డబ్బింగ్ ఖర్చులు కూడా సంపాధించలేకపోయేవి. ప్రస్తుతం విజయ్ నటిస్తున్న సినిమా తేరి.. రాజా రాణి దర్శకుడు అట్లి దర్శకత్వంలో వస్తున్న ఈ సినిమా టీజర్, ట్రైలర్స్ ఇప్పటికే ప్రేక్షకుల నుండి భారీ స్పందన వచ్చేలా చేసుకున్నాయి. అయితే విజయ్ తేరి సినిమా తెలుగులో కూడా భారీ అంచనాలు ఏర్పడేలా చేసుకుంది.
ఈ ఉత్సాహాన్ని చూసి దిల్ రాజు ఆ సినిమాను తెలుగులో డబ్ చేస్తున్నాడు. స్టార్ ప్రొడ్యూసర్ అయిన దిల్ రాజు విజయ్ సినిమాను తీసుకోవడం వల్ల సినిమా ఇక్కడ కూడా భారీగానే రిలీజ్ అయ్యే అవకాశాలు ఉన్నాయి. తేరి తెలుగు టైటిల్ ‘విన్నర్’ అని పెట్టే ఆలోచనలో ఉన్నారట దర్శక నిర్మాతలు. అయితే సాయి ధరం తేజ్, గోపిచంద్ మలినేని కాంబినేషన్ లో వస్తున్న సినిమాకు విన్నర్ అనే టైటి పెట్టినట్టు ఓ రెండు రోజుల క్రితం వార్తలు వచ్చాయి. కాని విన్నర్ టైటిల్ దిల్ రాజు ఆల్రెడీ తేరి సినిమా కోసం రిజిస్టర్ చేశాడట. ఇవాలో రేపో ఆ సినిమా గురించి అధికారిక ప్రకటనతో పాటుగా తెలుగులో ట్రైలర్ కూడా రిలీజ్ చేస్తారని తెలుస్తుంది.
అంతేకాదు సినిమాను కూడా కోలీవుడ్ లో రిలీజ్ చేసే ఏప్రిల్ 14నాడే తెలుగులో కూడా డైరెక్ట్ రిలీజ్ చేసే ఆలోచనలో ఉన్నాడట దిల్ రాజు. ప్రస్తుతం సరైన సక్సెస్ లేక సతమతమవుతున్న దిల్ రాజు విజయ్ సినిమాతోనైనా విజయ దుంధుంభి మోగిస్తాడో లేదో చూడాలి.
