ఇప్పుడు ఎక్కడ విన్నా ఊపిరి సినిమా గురించే హాట్ టాపిక్ నడుస్తుంది. టాలీవుడ్ మన్మధుడు కింగ్ నాగార్జున వీల్ చైర్ లో ఉన్నా సరే సినిమాను హిట్ చేసుకోగలడు అని మరోసారి తన సత్తా చాటుకున్నాడు. కార్తి, తమన్నా వారి పాత్రల పరిధి మేరకు నూటికి నూరు పాళ్లు న్యాయం చేశారు. అయితే సినిమా హిట్ టాక్ రావడం వల్ల కార్తి పాత్రలో నటించాల్సిన ఎన్టీఆర్ హిట్ సినిమా మిస్ అయ్యాడని ఫీల్ అవుతున్న విషయం తెలిసిందే. అయితే ఇదే కోవలో తమన్నా రోల్ చేయాల్సిన శృతి హాసన్ కూడా ఓ మంచి అవకాశాన్ని వదులుకుంది.
సినిమాలో ముందు తమన్నా పాత్రలో అనుకున్నది శృతినే.. కేవలం షూటింగ్ రెండు రోజుల్లో మొదలవుతుంది అనగా దర్శక నిర్మాతలకు డేట్స్ అడ్జెస్ట్ కావట్లేదంటూ షాక్ ఇచ్చింది శృతి హాసన్. అయితే రిలీజ్ అయ్యి సినిమా హిట్ అయిన ఈ నేపథ్యంలో సినిమాని వదులుకున్నందుకు శృతి కూడా చాలా బాధపడుతుందని కోలీవుడ్ టాక్. ఏది ఏమైనా తమన్నాకు లక్ ఉంది కాబట్టి ఊపిరి హిట్ తన ఖాతాలో పడేలా చేసుకుంది. ఆవారాతో అలరించిన కార్తి తమన్నాల జంట మరోసారి ఈ సినిమాలో ఆకట్టుకుంది.
ఫ్రెంచ్ సినిమా ఇన్ టచబుల్స్ కు రీమేక్ గా తెరకెక్కించబడిన ఈ సినిమా మన నేటివిటీకి తగ్గట్టుగా మార్పులు చేయడం జరిగింది. సున్నితమైన భావోద్వేగాలతో మనసుకి హత్తుకునేలా సినిమాను తీసి దర్శకుడిగా తన ప్రతిభను మరోసారి చాటుకున్నాడు వంశీ పైడిపల్లి. పివిపి బ్యానర్ లో పరం వి పొట్లూరి నిర్మించిన ఈ సినిమా రిలీజ్ అయిన అన్నిచోట్ల హిట్ టాక్ సొంతం చేసుకుని మంచి వసూళ్లను రాబడుతుంది.
