నాన్న‌కు ప్రేమ‌తో త‌ర‌వాత.. ఏమాత్రం విరామం తీసుకోకుండా జ‌న‌తా గ్యారేజీ సినిమా ప‌నుల్లో ప‌డిపోయాడు ఎన్టీఆర్. ఇప్పుడు తార‌క్ దృష్టంతా.. జ‌న‌తా గ్యారేజీని అనుకొన్న స‌మ‌యానికి విడుద‌ల చేయ‌డంపైనే ఉంది. ఆగ‌స్టు 12న ఈ చిత్రాన్ని విడుద‌ల చేయ‌బోతున్నామ‌ని కొబ్బ‌రికాయ్ కొట్ట‌కముందే ప్ర‌క‌టించేశారు. ఎట్టిప‌రిస్థితుల్లోనూ ఆడేట్ మిస్ అవ్వ‌కూడ‌ద‌ని ఎన్టీఆర్ అభిప్రాయం. అందుకే విశ్రాంతి కూడా తీసుకోకుండా జ‌ప‌తా గ్యారేజీ షూటింగ్‌ని ప‌రుగులు పెట్టిస్తున్నారు. ఇప్పుడు ఈస్పీడుకు బ్రేకులు ప‌డ్డాయి. జ‌న‌తా గ్యారేజీ షూటింగ్ ఆగింది.
ఉగాది కార‌ణంగా టీమ్‌కి సెల‌వ‌లు ప్ర‌క‌టించాడు ఎన్టీఆర్. విరామం లేకుండా ఎండ‌ల్లో షూటింగ్ చేయ‌డం కూడా అంత మంచిది కాద‌ని, మ‌ధ్య‌లో రిలాక్సేష‌న్ అవ‌స‌ర‌మ‌ని ఎన్టీఆర్ భావిస్తున్నాడ‌ట. పైగా తెలుగువారి తొలి పండ‌గ ఉగాదికి.. ఇంట్లోవాళ్ల‌తో గ‌డిపితే స‌రికొత్త ఉత్సాహం వ‌స్తుంద‌ని సెంటిమెంట్‌గానూ బెట‌ర్‌గా ఉంటుంద‌ని ఎన్టీఆర్ భావించాడ‌ట. అందుకే ప్ర‌స్తుతానికి షూటింగ్‌కి కామా పెట్టి, ఉగాది త‌ర‌వాత ఫ్రెష్‌గా మొద‌లెట్టాల‌ని ఎన్టీఆర్ సూచించాడ‌ని తెలుస్తోంది. సో.. జ‌న‌తా గ్యారేజీ షెడ్డుని నాలుగు రోజుల పాటు మూసేస్తార‌న్న‌మాట.
