తెలుగులో ఒకే ఒక్క సినిమా చేసినా సూప‌ర్ పాపులారిటీ సంపాదించుకొన్నాడు సుదీప్. ఈగ‌తో తెలుగులో ఫేమ‌స్ అయిపోయాడు. తెలుగులో హిట్ట‌యిన సినిమాల‌న్నీ క‌న్న‌డ‌లో రీమేక్ చేస్తూ… అక్కడ స్టార్ క‌థానాయ‌కుడిగా చ‌లామ‌ణీ అవుతున్నాడు. అత్తారింటికి దారేది సినిమాని క‌న్న‌డ‌లో రీమేక్ చేసి సూప‌ర్ హిట్ కొట్టాడు సుదీప్. ఇప్పుడు గోపాల గోపాల సినిమాకీ రీమేక్ చేయాల‌నుకొంటున్నాడ‌ట. గోపాల గోపాల‌కు మాతృక ఓమైగాడ్ అయినా… ప‌వ‌న్ న‌టించాడు కాబ‌ట్టి గోపాల గోపాల డీవీడీ ముంద‌రెట్టుకొని ఒక‌టికి ప‌దిసార్లు చూసి ప‌వ‌న్ న‌ట‌న‌కు ఫ్యాన్ అయిపోయాడ‌ట సుదీప్. అంతేకాదు.. గోపాల గోపాలలో ప‌వ‌న్ వాడిన బైకుపై మోజుప‌డి.. దాన్ని ల‌క్ష‌లు పోసి కొన్నాడ‌ట.
గోపాల గోపాలలో ప‌వ‌న్ ఇంట్ర‌డ‌క్ష‌న్ సీన్ ఓ బైకు మీద తెర‌కెక్కించారు. ఆ బైకుని ఈ సినిమా కోసం ప్ర‌త్యేకంగా డిజైన్ చేశారు. గోపాల గోపాల షూటింంగ్ అయిపోయినా ఆ బైకుని సురేష్ ప్రొడ‌క్ష‌న్స్ ఆఫీసులో భద్ర‌ప‌రిచారు. ఇప్పుడు ఆ బైకుపై సుదీప్ మ‌న‌సు ప‌డ్డాడ‌ట. సురేష్ బాబుతో బేర‌మాడి సుదీప్ ఆ బైకుని కొనేశాడ‌ని టాక్‌. ఎంత రీమేక్ సినిమా అయినా.. బైకుతో స‌హా అన్నీ కాపీ కొట్టేయాలంటే ఎలా?? కానీ సుదీప్ మాత్రం.. ‘ఇదంతా ప‌వ‌న్‌పై నాకున్న అభిమానం’ అంటున్నాడ‌ట. ఎవ‌రి పిచ్చి వాళ్ల‌కానందం మ‌రి.
