అసలే ముక్కిడి.. ఆపై పడిశం అన్న సామెత చందంగా తయారవుతున్నది తమిళనాట ఎన్నికలకు సిద్ధం అవుతున్న కాంగ్రెస్‌ పార్టీ పరిస్థితి. ఈ రాష్ట్రంలో ఏదో తమ పార్టీ దక్షిణాది రాష్ట్రాలలో కూడా బతికి ఉన్నది అని చెప్పుకోవడానికి పోటీలోకి దిగాల్సిందే తప్ప.. కాంగ్రెస్‌ పార్టీకి.. నామమాత్రంగా కూడా ఠికానా లేదనే సంగతి అందరికీ తెలిసిన సంగతే. అందుకే తమకు సొంతంగా బరిలోకి దిగే సత్తా ఏనాటికీ ఉండదు గనుక.. ఎవరో ఒకరి భుజాల మీద డిపెండ్‌ అయి, వారు దయపట్టిన సీట్లలో పోటీచేస్తుంటారు. ఈసారి కూడా డీఎంకే పొత్తుతో 41 సీట్లలో కాంగ్రెస్‌ పోటీచేస్తున్న సంగతి మనకు తెలుసు.
పార్టీ పరిస్థితి ఇంత దయనీయంగా ఉన్నా.. ఎత్తుగడల్లో ముదిరిన కాంగ్రెస్‌ నేతలు ఎలాగో ఒకలా ఆరాష్ట్రంలో కూడా కొందరు సినీ సెలబ్రిటీలు తమ పార్టీలో కీలకంగా ఉండేలా చూసుకుంటుంటారు. ఆ కోటాలోనే వెటరన్‌ హీరోయిన్‌, ఒకప్పట్లో యువతరాన్ని ఉర్రూతలూగించిన ఖుష్బూ కూడా ఉంది. ప్రస్తుతం ఆమె కాంగ్రెస్‌ పార్టీ నాయకురాలు. తన అందచందాల ప్రదర్శనలతో తమిళులకు అప్పట్లో వెర్రెత్తించిన ఈ ఉత్తరాది భామ తనకు గుడి కట్టి పూజించేంత క్రేజ్‌ సంపాదించుకుంది. అయితే అదంతా గతం.. ఇప్పుడు అదే ఖుష్బూ కాంగ్రెస్‌ పార్టీకి గుదిబండగా మారిందనే విశ్లేషణలు వినిపిస్తున్నాయి.
ఆమె ఓ ఇంటర్వ్యూలో హిజ్రాలకు వ్యతిరేకంగా చేసిన కొన్ని వ్యాఖ్యలు.. కాంగ్రెస్‌ను వారంతా కలిసి తూర్పారపట్టడానికి కారణం అవుతున్నాయి. హిజ్రాలు తమను తిట్టినందుకు మాత్రమే కాంగ్రెస్‌ మీద ఎదురుదాడి చేయడంలేదు. ఉత్తరాదికి చెందిన ఖుష్బూ తమిళ మహిళల మనోభావాలు దెబ్బతినేలా పలు సందర్భాల్లో వ్యాఖ్యలు చేశారంటూ పాత సంగతులన్నీ ఇప్పుడు తవ్వి తీస్తున్నారు. ఏదో సినీగ్లామర్‌ ఎన్నికల్లో ఉపయోగపడుతుందని కాంగ్రెస్‌ భావిస్తోంటే.. ఇప్పుడు ఖుష్బూ పేరెత్తితేనే తమిళులు, మహిళలు మండిపడే పరిస్థితి ఏర్పడుతోంది. నాయకులు ఎంత సీనియర్లు అయినా.. నాలుక మీద అదుపులేకుండా.. ఇచ్చమొచ్చినట్లు వ్యాఖ్యలు చేస్తే పర్యవసానాలు ఇలాగే ఉంటాయి మరి!