శ్రీనగర్ ఎన్.ఐ.టి. వివాదంలో అనేక అనూహ్య విషయాలు వెలుగుతోకి వస్తున్నాయి. తరచూ పాకిస్తాన్, ఐసిస్ జెండాలతో వీధుల్లోకి వచ్చి వీరవిహారం చేసే ముష్కరమూకను పోలీసులు ఏమీ అనరు. వాళ్లకు చాలా దూరంలో నిలబడి, సుతారంగా సుతిమెత్తగా భాష్పవాయువు ప్రయోగిస్తారు. అంతే, ఇక చోద్యం చూస్తూ ఉంటారు. జాతి వ్యతిరేక శక్తులు రాళ్లు రువ్వుతున్నా సంయమనం పాటిస్తారు. చేతిలోన తుపాకులు, లాఠీలను ఉపయోగించాలనే ఆలోచనే వాళ్లకు రాదు.

శ్రీనగర్ నాన్ లోకల్ విద్యార్థులు రక్షణ కల్పించాలంటూ జాతీయ పతాకంతో మౌన ప్రదర్శన చేశారు. కాశ్మీర్లో ఎప్పుడూ పాక్ జెండాలతో ప్రదర్శన చూసిన పోలీసులకు, త్రివర్ణ పతాకం కొత్తగా కనిపించిందేమో. బహుశా ఇదే విదేశీ జెండా అనుకున్నారో. విద్యార్థులపై విరుచుకుపడ్డారు. రక్షణ కోరిన వాళ్లను రాక్షసంగా కొట్టారు. తలలు పగిలేలా లాఠీచార్జి చేశారు. ఇంతా చేసి వాళ్లు చేసిన తప్పేంటి? జాతి వ్యతిరేక చర్యలను అడ్డుకోవడం. అది కూడా కాశ్మీర్లో నేరమేనా?

టీ20 ప్రపంచ కప్ ఫైనల్లో వెస్టిండీస్ చేతిలో భారత్ ఓడిపోయింది. క్యాంపస్ లోని కొందరు స్థానికు కాశ్మీరీ యువకులు పండుగ చేసుకున్నారు. పటాకులు కాల్చారు. సంబరాలు జరుపుకున్నారు. ఇతర రాష్ట్రాలకు చెందిన యువకులు దీన్ని అడ్డుకున్నారు. దీంతో ఘర్షణ తలెత్తింది. అప్పటి నుంచీ లోకల్ విద్యార్థుల ఆగడాలకు అడ్డు లేకుండా పోయింది. చివరకు, స్థానికేతర మహిళా విద్యార్థులను రేప్ చేస్తామంటూ బెదిరిస్తున్నారు. దీంతో తమకు రక్షణ కల్పించాలని క్యాంపస్ లో ప్రదర్శన చేసిన వాళ్లను గొడ్డును బాదినట్టు బాదారు కాశ్మీరీ పోలీసులు.

కాశ్మీరీ పోలీసులు అంతటిలో ఆగలేదు. వాళ్లు విద్యార్థుల దగ్గరున్న జాతీయ పతాకాన్ని గుంజుకున్నారు. ఇంత జరిగినా ముఖ్యమంత్రి మెహబూబా ముఫ్తీ కిమ్మనడం లేదు. వేర్పాటు వాదులకు అనుకూల పార్టీగా పీడీపీకి పేరుంది. ఆ పార్టీ అధికారంలోకి వచ్చిన తర్వాత వేర్పాటు వాదులు ఆడింది ఆటగా మారింది. దానితో జతకట్టిన బీజేపీ మాత్రం చేతులు ముడుచుకుని కూర్చుంది. కాశ్మీర్లో అధికారంలో ఉన్నాం అనిపించుకోవడం కోసం అన్నీ వదిలేసిందనే అపఖ్యాతి మూటగట్టుకుంది. ఎన్ ఐ టి లో ఇన్ని అరాచకాలు జరుగుతున్నా బీజేపీకి చెందిన ఉప ముఖ్యమంత్రి, మంత్రులు, ఎమ్మెల్యేలు ఇతర నాయకులకు చీమకుట్టినట్టయినా లేదు. అధికార మత్తులో జోగుతున్నారనే విమర్శలు వెల్లువెత్తుతున్నాయి. చివరకు పాంథర్స్ పార్టీ నిరసన ప్రదర్శనలు చేస్తోంది. బంద్ కు పిలుపునిచ్చింది. బీజేపీ పదవీ వ్యామోహంలో పడి జాతి వ్యతిరేక శక్తుల పట్ల మెతక వైఖరి అవలంబిస్తోందనే విమర్శకు ప్రధాని మోడీ ఏం జవాబ చెప్తారో మరి.