సుకుమార్ మంచి ద‌ర్శ‌కుడే కాదు.. నిర్మాత కూడా. సుకుమార్ రైటింగ్స్ అంటూ ఓ బ్యాన‌ర్ స్థాపించి, కుమారి 21 ఎఫ్ తీశాడు. ప‌క్కా కుర్రాళ్ల సినిమా అది. సూప‌ర్ హిట్ అయిపోయింది. ఇప్పుడు కుమారి ఇచ్చిన ధైర్యంతో మ‌రో సినిమాకి శ్రీ‌కారం చుట్టాడు. ఈ చిత్రానికి కుషన్‌షా కిర‌ణ్ ద‌ర్శక‌త్వం వహిస్తారు. క‌థ‌, మాట‌లు, స్ర్కీన్ ప్లే.. సుకుమార్ అందించ‌నున్నారు. క‌థానాయ‌కుడిగా నాగ‌శౌర్య‌కి కూడా ఎంచుకొన్నారు. త్వ‌ర‌లో ఈ సినిమా ప‌ట్టాలెక్కాల్సింది. అయితే స‌డ‌న్‌గా సుక్కు త‌న నిర్ణ‌యం మార్చుకొని నాగ‌శౌర్య‌కు షాక్ ఇచ్చాడు.

ఈ సినిమాలోంచి నాగ‌శౌర్య‌ని త‌ప్పించి సుకుమార్ మ‌రో హీరో కోసం అన్వేషిస్తున్నాడు. త‌న‌ని డ్రాప్ చేయడం ప‌ట్ల‌.. నాగ‌శౌర్య ఫీల‌వుతున్నాడ‌ట‌. వ‌రుస ఫ్లాపుల్లో ట్రాక్ త‌ప్పిన శౌర్య‌కు మొన్నామ‌ధ్యే… క‌ల్యాణ వైభోగ‌మే తో డీసెంట్ హిట్ ద‌క్కింది. అయితే.. వ‌సూళ్ల ప‌రంగా ఆ సినిమా కూడా నిరాశ ప‌రిచింది. దానికి తోడు శౌర్య కాస్త టెంప‌ర్ చూపిస్తుంటాడ‌ట‌. దాంతో.. సుక్కు త‌న నిర్ణ‌యాన్ని మార్చుకొన్న‌ట్టు తెలుస్తోంది. మ‌రి.. శౌర్య స్థానంలో కొత్త‌గా వ‌చ్చే హీరో ఎవర‌న్న‌ది తెలియాలంటే ఇంకొంత కాలం ఆగాలి.