భ‌క్త క‌న్న‌ప్ప గురించి ఇద్ద‌రు హీరోలు పోటీ ప‌డుతున్నారిప్పుడు. ఒక హీరో ప్ర‌భాస్ అయితే.. మ‌రో హీరో మంచు విష్ణు. ప్ర‌భాస్ తో భ‌క్త‌క‌న్న‌ప్ప సినిమాని భారీ లెవిల్లో తీయాల‌ని… కృష్ణంరాజు ఎప్ప‌టి నుంచో అనుకొంటున్నారు. దానికి సంబంధించి గోపీ కృష్ణా మూవీస్‌లో స్ర్కిప్టు వ‌ర్క్ కూడా జ‌రుగుతోంది. అయితే స‌డ‌న్‌గా విష్ణు ఎంట్రీ ఇచ్చాడు. త‌నికెళ్ల భ‌ర‌ణి ద‌ర్శ‌క‌త్వంల‌తో క‌న్న‌ప్ప క‌థ‌ని రెడీ చేశారు. దాన్నీ భారీ స్థాయిలో తీయ‌డానికి సిద్ధ‌మ‌య్యాడు. దాంతో ఈ ఇద్ద‌రి సినిమాల్లో ఏది ముందొస్తుందా అనే ఆస‌క్తి మొద‌లైంది. అయితే మ‌ధ్య‌లో ఏమైందో… మంచు విష్ణు ఈ ప్రాజెక్టు నుంచి డ్రాప్ అయిన‌ట్టు చెప్పుకొన్నారు. దాంతో ప్ర‌భాస్‌కి లైన్ క్లియ‌ర్ అయ్యింద‌నుకొన్నారు.

అయితే ఇప్పుడు విష్ణు మ‌ళ్లీ మాట మార్చాడు. ‘క‌న్న‌ప్ప సినిమా ఉంటుంది.. భ‌ర‌ణి గారు క‌థ రెడీ చేశారు. త్వ‌ర‌లోనే ఈ సినిమాని ప్రారంభిస్తాం. అస‌లు ఈ క‌థ‌ని ప్ర‌భాస్ చేస్తున్న‌ట్టు నాకు తెలీదు’ అంటున్నాడు. ఈ సినిమాలో మోహ‌న్ బాబు కూడా న‌టిస్తున్నార‌ని విష్ణు చెబుతున్నాడు. అంటే.. తెలుగులో క‌న్న‌ప్ప క‌థ‌లు రెండు రాబోతున్నాయ‌న్న‌మాట‌. ప్ర‌భాస్ బాహుబ‌లి 2తో బిజీగా ఉన్నాడు కాబ‌ట్టి.. విష్ణునే త‌న సినిమాకి ముందు రిలీజ్ చేసే అవ‌కాశాలున్నాయి. వెంట వెంట‌నే ఒకే క‌థ తో రెండు సినిమాలు తెర‌కెక్క‌డం.. స్ట్రాట‌జీ ప‌రంగా మంచిది కాదు. సో.. ప్ర‌భాస్ డ్రాప్ అవుతాడా? లేదంటే క‌న్న‌ప్ప పై ఉన్న ఇష్టంతో.. తానూ రంగంలోకి దిగుతాడా? అన్న‌ది ఆస‌క్తిగా మారింది.