విశాఖ రైల్వే జోన్ దశాబ్దాలుగా పెండింగులో ఉన్న డిమాండ్. ప్రభుత్వాలు మారుతున్నాయి, ఎంపీలు మారుతున్నారు, డిమాండ్ మాత్రం అలాగే ఉంది. భువనేశ్వర్ కేంద్రంగా పనిచేస్తున్న తూర్పు కోస్తా రైల్వే జోన్ లో భాగంగా ఉన్న విశాఖకు ఒక ప్రత్యేక జోన్ కావాలనే డిమాండ్ అత్యాశ ఏమీ కాదు.

ఉమ్మడి ఆంధ్రప్రదేశ్ లో సగం విశాఖ జిల్లా, విజయనగరం, శ్రీకాకుళం జిల్లాలు మినహా మిగతా ప్రాంతమంతా దక్షిణమధ్య రైల్వేలో భాగంగా ఉంది. రాష్ట్ర విభజన జరిగినా అలాగే కొనసాగుతోంది. విశాఖ జిల్లాలోని అనకాపల్లి వరకూ దక్షిణ మధ్య రైల్వేనే. దువ్వాడ దాటగానే తూర్పు కోస్తా జోన్ మొదలవుతుంది. దీనివల్ల అనేక విధాలుగా ఆ ప్రాంతం నిర్లక్ష్యానికి గురవుతోంది. కొత్త రైళ్లు వేయాలన్నా, రైళ్ల రూటును పొడిగించాలన్నా ఇబ్బందిగా ఉంది.

తూర్పు కోస్తా జోన్ లో ఒరిస్సా వాళ్లదే పెత్తనం. హైదరాబాద్ నుంచి విశాఖ వెళ్లే రైళ్లను భవనేశ్వర్ వరకూ పొడిగించుకున్నా అడిగే అవకాశం లేదు. ఈ జోన్ లో మూడు డివిజన్లున్నాయి. వాల్తేర్ (విశాఖ), ఖుర్దా రోడ్, సంబల్ పూర్ డివిజన్లు దీనిలో భాగం. భౌగోళికంగా వాల్తేరు డివిజనే పెద్దది. ట్రాక్ కిలోమీటర్, రూట్ కిలోమీటర్లలో ఈ డివిజన్ విస్తీర్ణమే ఎక్కువ. కానీ ట్రాక్ విద్యుదీకరణలో మాత్రం నిర్లక్ష్యానికి గురవుతోంది. ఖుర్దారోడ్ డివిజన్లో 1965 కిలోమీటర్ల మేరు ఎలక్ట్రిఫికేషన్ పూర్తయింది.

తూర్పు కోస్తా జోన్ లో సరుకుల రవాణా ఆదాయం ఎక్కువగా వచ్చేది వాల్తేరు డివిజన్ నుంచే. విశాఖ పోర్టు, ఉక్కు ఫ్యాక్టరీ తో పాటు ఇంకా అనేక అవసరాల కోసం సరుకుల రవాణా జోరుగా జరుగుతుంది. ఉక్కుఫ్యాక్టరీకి బొగ్గు రవాణాకు, ఉత్పత్తి అయిన ఉక్కు రవాణాకు గూడ్స్ రైళ్లను ఉపయోగిస్తారు. ఇతర ప్రాంతాల నుంచి విశాఖ పోర్టుకు, పోర్టు లో దింపిన సరుకును ఇతర ప్రాంతాలకు తరలించడానికి కూడా గూడ్స్ రైళ్లను వాడతారు. కాబట్టి కార్గో హ్యాండ్లింగ్ ఎక్కువ. వాల్తేరు డివిజన్ ను వదులకుంటే ఈ ఆదాయం పోతుందనేది ఒరిస్సా అధికారుల ఉద్దేశం. అందుకే కేంద్రంలో చక్రం తిప్పుతారని, విశాఖకు జోన్ రాకుండా అడ్డుకుంటాని ఆరోపణలున్నాయి.

ప్రస్తుత రైల్వే మంత్రి సురేష్ ప్రభు వాస్తవిక దృష్టితో ఆలోచించే వ్యక్తి అని పేరు. ఆ శాఖలో అనేక మార్పుల కోసం ప్రయత్నిస్తున్నారు. విశాఖ జోన్ అవసరం అనే విషయం ఆయనక అర్థమైందంటున్నారు. పైగా ఏపీలో అధికారంలో ఉన్న టీడీపీ, ఎన్డీయేలో భాగస్వామి. విశాఖ ఎంపీ బీజేపికి చెందిన వారు. జోన్ గురించి ఆయన కూడా ప్రయత్నాలు చేస్తున్నారు. అయినా అది జరగక పోవడానికి కారణం ఏమిటో అర్థం కాదు. రైల్వే మంత్రి ఇప్పటికైనా వాస్తవాన్ని గుర్తిస్తే వీలైనంత త్వరగా విశాఖ జోన్ కల నిజమయ్యే అవకాశం ఉంటుంది.