తెలుగులో ఈమ‌ధ్య శ్రుతిహాస‌న్ జోరు కాస్త త‌గ్గింది. ఆమె చేతిలో ఉన్న‌ది ఇప్పుడు ప్రేమ‌మ్ ఒక్క‌టే! ఇలాగైతే.. మిగిలిన హీరోయిన్లు త‌న‌ని ఓవ‌ర్ టేక్ చేసుకొని వెళ్లిపోవ‌డం ఖాయం అనుకొందో ఏమో.. ఇప్పుడు గేరు మార్చి వ‌రుస‌గా సినిమాలు ఒప్పుకొంటోంది. అందులో భాగంగానే ఇప్పుడో సినిమాపై సంత‌కం చేసిన‌ట్టు స‌మాచారం. నితిన్ – కొండా విజ‌య్‌కుమార్ కాంబినేష‌న్లో ఓ చిత్రం తెర‌కెక్క‌బోతోంది. నిఖితా రెడ్డి నిర్మాత. ఈ చిత్రంలో క‌థానాయిక‌గా శ్రుతిని ఎంచుకొన్నార్ట. నితిన్, శ్రుతిహాస‌న్ కాంబో సెట్ట‌వ్వ‌డం ఇదే తొలిసారి.
గుండెజారి గ‌ల్లంత‌య్యిందే సినిమాతో ఆక‌ట్టుకొన్నాడు కొండా విజయ్ కుమార్‌. ఆ త‌ర‌వాత చిన్న‌దాన నీకోసం అట్ట‌ర్ ఫ్లాప్ అయ్యింది. అయినా ఈ ద‌ర్శ‌కుడిపై ఉన్న న‌మ్మకంతో నితిన్ మ‌రో అవ‌కాశం ఇచ్చాడు. ఈ క‌థ గుండెజారి గ‌ల్లంత‌య్యిందే సినిమాకి సీక్వెల్‌లా ఉంటుంద‌ట. క‌థానాయిక పాత్ర‌కు ఎంతో ప్రాధాన్యం ఉంద‌ని, అందుకే శ్రుతిని ఎంచుకొన్నార‌ని తెలుస్తోంది. ప్ర‌స్తుతం అ..ఆ షూటింగ్‌లో బిజీగా ఉన్నాడు నితిన్. ఏప్రిల్ నెలాఖ‌రుకి షూటింగ్ పూర్త‌వుతుంది. ఆ త‌ర‌వాతే.. కొండా సినిమా సెట్స్‌పైకి వెళ్తుంది.
