మోహ‌న్‌బాబుకి త‌న ఇంట్లో ఉన్న హీరోల‌పై ఎంత న‌మ్మ‌క‌మో? ఏ తండ్రికైనా అలాంటి న‌మ్మ‌కాలు ఉండాల్లెండి. కాక‌పోతే… మోహ‌న్‌బాబుది ఎప్పుడూ ఓవ‌ర్ ఎక్స్‌పెక్టేష‌న్సే. తాజాగా ఈడోర‌కం ఆడోర‌కంలోనూ… మోహ‌న్ బాబు మాట‌ల్లో అదే ధ్వనించింది. `గుండ‌మ్మ క‌థ‌` సినిమాని ఆయ‌నకు రీమేక్ చేయాల‌ని వుంద‌ట‌. త‌ప్పేం లేదు. కానీ హీరోలె ఎవ‌ర‌నుకొంటున్నారు?? మంచు విష్ణు, రాజ్ త‌రుణ్‌. అదే అస‌లు సిస‌లైన జోక్‌. దీనికంటే బ్ర‌హ్మాండ‌మైన జోకేంటంటే ఈసినిమాకి జి. నాగేశ్వ‌ర‌రెడ్డికి ద‌ర్శ‌కత్వ బాధ్య‌త‌లు అప్ప‌గిస్తార‌ట‌.

గుండ‌మ్మ క‌థ‌.. ఆల్ టైమ్ గ్రేటెస్ట్ హిట్‌. ఓ క్లాసిక్ సినిమా అది. దాన్ని ముట్టుకోవ‌డం అతి పెద్ద సాహ‌సం. ఎన్టీఆర్ – నాగ‌చైత‌న్య‌లు సైతం ఈ సినిమాని చేద్దామ‌నుకొన్నారు. కానీ.. ఇంత‌టి మ‌హోన్న‌త స‌బ్జెక్ట్‌ని త‌ల‌కెక్కుకోగ‌లిగిన ద‌మ్ము ఏ ద‌ర్శ‌కుడికి ఉంది? స‌రే.. ద‌ర్శ‌కుడు దొరికాడ‌నుకొందాం. గుండ‌మ్మ‌గా.. సూరేకాంతంని భ‌ర్తీ చేస్తారా? ఎస్వీ రంగారావు పాత్ర‌కు ధీటైన న‌టుడ్ని తీసుకొస్తారా? అస‌లు ఎన్టీఆర్‌, ఏఎన్నార్ పాత్ర‌ల‌కు విష్ణు, రాజ్ త‌రుణ్‌లు స‌రిపోతారా? ఏంటో పెద్దాయ‌న‌.. ఇవ‌న్నీ ఆలోచించ‌కుండా మాట్లాడేశారు. దాంతో ఆయ‌న సీరియ‌స్‌గా చెప్పిన విష‌యం కూడా జోకైపోయిందిప్పుడు.