పోకిరి సినిమాకి ప్రాణం.. క్లైమాక్స్ ముందొచ్చే ట్విస్టే! అప్ప‌టి వ‌ర‌కూ పోకిరి ముసుగులో ఉన్న‌ది ప‌వ‌ర్‌ఫుల్ పోలీస్ ఆఫీస‌ర్ అని తెలిసి ఆడియ‌న్స్ అవాక్క‌య్యారు. ఆ సినిమా సూప‌ర్ డూప‌ర్ హిట్ట‌య్యింది. ఆ త‌ర‌వాత చాలా సినిమాల్లో పోకిరి ఫీవ‌ర్ క‌నిపించింది. ఇప్పుడు నాగ‌చైత‌న్య సినిమాలోనూ ఇలాంటి ట్విస్టే ఉండ‌బోతోంద‌ని టాక్‌. నాగ‌చైత‌న్య – గౌత‌మ్ మీన‌న్ క‌ల‌యిక‌లో ఓ చిత్రం రూపుదిద్దుకొంటోంది. అదే.. సాహ‌సం శ్వాస‌గా సాగిపో. జూన్‌లో ఈ చిత్రం ప్రేక్ష‌కుల ముందుకువ‌స్తోంది. ఈ సినిమాలో చైతూ ఓ పోలీస్ ఆఫీస‌ర్ గా క‌నిపిస్తాడ‌ట‌.

గౌత‌మ్ మీన‌న్‌కి పోలీస్ క‌థ‌లంటే మ‌క్కువ ఎక్కువ‌. ఆ ప్రేమ‌తోనే ఈ సినిమాలో చైతూని పోలీస్‌గా చూపిస్తున్నాడ‌ట‌. అయితే… చైతూ పోలీస్ అన్న విష‌యం అచ్చం పోకిరి సీన్‌లానే.. క్లైమాక్స్‌కి ముందు తెలుస్తుంద‌ట‌. అదే ఈ సినిమాలో అతి పెద్ద ట్విస్ట‌ని వినికిడి. అయితే.. అది ముందే లీక్ అయిపోవ‌డంతో చిత్ర‌బృందం కాస్త ఇబ్బందుల్లో ప‌డింది. సోష‌ల్ మీడియాలో చైతూ పోలీస్ యూనిఫామ్‌లో ఉన్న ఓ ఫొటో చ‌క్క‌ర్లు కొడుతోంది. ఆ తీగ లాగితే.. ఇలా ట్విస్టు డొంక క‌దిలింది. పోకిరి ని న‌మ్మ‌కొన్న చైతూ ప‌రిస్థితేంటో?