తొలి సినిమా అఖిల్… అఖిల్‌కి గ‌ట్టి షాక్ ఇచ్చింది. అందులోంచి తేరుకోవ‌డానికి చాలా టైమే తీసుకొన్నాడు. అయితే రెండో సినిమాని మాత్రం ప‌క్కాగా ప్లాన్ చేశాడు. హిట్ల‌తో మంచి దూకుడు మీదున్న వంశీపైడిప‌ల్లిని ప‌ట్టుకొన్నాడు. బాలీవుడ్ సూప‌ర్ డూప‌ర్ హిట్ యూత్‌ఫుల్ మూవీ యేజ‌వానీ హై దివానీ ని రీమేక్ చేద్దామ‌ని డిసైడ్ అయ్యాడు. వంశీపైడిప‌ల్లి కూడా రీమేక్ సినిమాలు తీయ‌డంలో దిట్టే. అందుకే.. ఈ క‌థే సెట్ట‌యిపోద్ద‌నుకొన్నారంతా. అయితే.. అఖిల్ ఈలోగా మ‌న‌సు మార్చుకొన్నాడు. రీమేక్ సినిమాలు అంత‌గా కాసులు రాల్చ‌డం లేద‌న్న వాస్త‌వాన్ని గ్ర‌హించిన అఖిల్.. ఇప్పుడు ఆ హిందీ సినిమాని ప‌క్క‌న పెట్టాడ‌ట.
ఈలోగా వంశీ ద‌గ్గరున్న మ‌రో యూత్‌ఫుల్ ల‌వ్ స్టోరీకి అఖిల్ ఓకే చెప్పిన‌ట్టు తెలుస్తోంది. వంశీ కూడా ఈ క‌థ‌ని నాగార్జున‌కు వినిపించి.. నాగ్ అంగీకారాన్ని కూడా సంపాదించాడ‌ట. అయితే క‌థ‌పై మ‌రో నెల‌రోజులైనా క‌స‌ర‌త్తు చేయాల్సివుంద‌ని తెలుస్తోంది. లేట‌యినా ఫ‌ర్వాలేదు.. మంచి స్ర్కిప్టుతోనేచేద్దాం అని నాగ్, అఖిల్‌లు భ‌రోసా ఇవ్వ‌డంతో వంశీ ఇప్పుడు కొత్త క‌థ‌ని వండి వార్చే ప‌నిలో ఉన్నాడ‌ని టాక్‌. అంటే.. అఖిల్ రెండో సినిమాకి ఇంకాస్త స‌మ‌యం ప‌డుతుంద‌న్న‌మాట.
