ఇన్నేళ్ల హిట్ దాహాన్ని నేను శైలజ సినిమాతో తీర్చుకున్నాడు హీరో రామ్. ఈ సంవత్సరం మొదటి రోజే రిలీజ్ అయిన ఆ సినిమా రామ్ కెరియర్ లోనే సూపర్ హిట్ సినిమాగా నిలిచింది. ఇక అదే సినిమాతో మలయాళ భామ కీర్తి సురేష్ కూడా మంచి పాపులారిటీ సంపాదించింది. ఇక్కడే కాదు తమిళంలో కూడా కీర్తి లక్ కంటిన్యూ అవుతుందనుకోండి. ఇక శైలజ హిట్ రామ్ లో ఓ కొత్త ఉత్సహాన్ని తెచ్చింది. అందుకే ఇక నుండి సినిమా కథల విషయంలో కాస్త ఎక్కువ జాగ్రత్త పడుతున్నాడు.
ప్రస్తుతం రామ్ తనకు కందిరీగ లాంటి హిట్ ఇచ్చిన దర్శకుడు సంతోష్ శ్రీనివాస్ తో ఓ సినిమా చేస్తున్నాడు. 14 రీల్స్ బ్యానర్ లో నిర్మించబడుతున్న ఈ సినిమా ఇటీవల పూజా కార్యక్రమాలు జరుపుకుంది. మొన్నటిదాకా హీరోయిన్ ఫైనల్ అవ్వని ఈ సినిమాలో మిల్కీ బ్యూటీ తమన్నా ఓకే అయినట్టు సమాచారం. రామ్, తమన్నా కరుణాకరణ్ దర్శకత్వంలో వచ్చిన ఎందుకంటే ప్రేమంట సినిమాలో జతకట్టడం జరిగింది. అయితే పెయిర్ బాగున్నా సినిమాలో కంటెంట్ ప్రేక్షకులకు సరిగా అర్ధం కాక ఆ సినిమా ఫ్లాప్ అయ్యింది. అయితే ఈసారి మాత్రం ఈ ఇద్దరు హిట్ కొట్టేయడం ఖాయమంటున్నారు చిత్రయూనిట్. మరి క్రేజీ కాంబోగా వస్తున్న ఈ సినిమా ఎలాంటి ఫలితాన్ని అందిస్తుందో చూడాలి.
