ఆంధ్రప్రదేశ్‌ రాష్ట్రంలో ఇప్పుడు రాజకీయ శూన్యత ఉన్నదని, కాంగ్రెస్ పార్టీ అంతరించి పోయిన ఈ రాష్ట్రంలో ఆ ఖాళీని తాము భర్తీ చేసినట్లయితే.. భవిష్యత్తులో ఒంటరిగా కూడా అధికారంలోకి రాగల స్థాయికి తమ పార్టీ చేరుకుంటుంది.. అని చాన్నాళ్లుగా భారతీయ జనతా పార్టీ మురిసిపోతూనే ఉన్నది. ఎక్కడికక్కడ నియోజకవర్గాల్లో నాయకులు వచ్చే ఎన్నికలకు తెదేపా , భాజపా వేర్వేరుగా పోటీచేస్తాయని.. తామే బీజేపీ అభ్యర్థులు అయిపోతాం అని కూడా తమ ప్రయత్నాల్లో ఉన్న స్థానిక నాయకులు ఉత్సాహపడుతున్నారు. ఇలాంటి నేపథ్యంలో.. తాజాగా ప్రత్యేకహోదా విషయంలో మోడీ సర్కారు చేసిన వంచన ఏపీలోని భాజపా నాయకులకు షాక్‌ తినిపించింది. ఏపీలో స్వతంత్రంగా తాము అధికారంలోకి రావడం అనేది తర్వాతి సంగతి.. ముందు ప్రజల వద్ద ఛీత్కారాలకు గురికాకుండా ఉంటే చాలునని ఆ పార్టీ నాయకులు ఇప్పుడు బెదిరిపోతున్నారు.
మూడురోజులుగా రాష్ట్రంలోని భారతీయ జనతా పార్టీ నాయకులు మీడియా ముందుకు రావాలంటేనే మొహం చాటేస్తున్నారు. భయపడిపోతున్నారు. హోదా అంశం కీలకమైనది గనుక.. మీడియా వారిని అభిప్రాయం అడగకుండా వదలిపెట్టదు గనుక.. టీవీ ఛానెళ్లలో డిస్కషన్లకు ఆహ్వానించినప్పుడు ఏదో ఒకరిద్దరు బీజేపీ నాయకులు అందులో పాల్గొంటున్నారు తప్ప.. మరో రకంగా…వారు జనం ముందుకు రావడానికి సాహసించడం లేదు.
బీజేపీ పేరు చెప్పుకుని జనం ముందుకు ఏ నాయకుడు వచ్చినా జనం వారిని నిలదీసే పరిస్థితి ఏర్పడుతోంది. హోదా విషయంలో మోడీ సర్కారు ఇంత దారుణంగా మోసం చేశాక ఇంకా ఆ పార్టీలో ఉండడం ఎందుకు అంటూ జనం వారిని నిలదీసే పరిస్థితి ఏర్పడుతోంది. స్థానిక నాయకులు ఏదో తమకు భవిష్యత్తు ఉంటుందని మురిసిపోవడమే తప్ప.. ఆంధ్రప్రదేశ్‌ మీద భాజపాకు, ప్రత్యేకించి కేంద్ర నాయకత్వానికి ఏమాత్రం శద్ధ్ర లేదని చాలా సందర్భాల్లో వెల్లడైంది. ప్రస్తుతం ఆ ఆశ కూడా వారికి లేదని తేలుతోంది. ఏపీలో పాలిస్తున్నది తమ మిత్రపక్షమే అయినా, తాము స్పష్టంగా ఇచ్చిన హామీలే అయినా, అవి చట్టబద్ధమే అయినప్పటికీ.. ఇలాంటి దొంగ నాటకాలు ఆడుతున్న నేపథ్యంలో భాజపాకు రాష్ట్రంలో కాలం చెల్లుతున్నదని చెప్పకతప్పదు.
