తాను ఇప్పటికి 22 సార్లు ఢిల్లీ వెళ్లి కేంద్ర మంత్రుల్ని ప్రధానిని కలిసి వచ్చానని చంద్రబాబునాయుడు చెప్పుకుంటారు. దేశంలో మరే ఇతర ముఖ్యమంత్రి కూడా వెళ్లనన్ని సార్లు తాను ఢిల్లీ వెళ్లి అందరితో భేటీ అయి రాష్ట్ర ప్రయోజనాలను రాబట్టుకోవడానికి కష్టపడుతున్నానని ఆయన తన గురించి తాను చెప్పుకుంటూ ఉంటారు. అంతా నిజమే కావచ్చు.. ఆయన వీలైనంత వరకు ప్రతిసారీ ప్రధానిని కూడా కలిసి రాష్ట్రంలో సాధిస్తున్న పురోగతి గురించి అటు రాజధాని లేదా ఇతర పథకాల విషయంలో చొరవ గురించి గానీ వివరిస్తూనే ఉండవచ్చు. కానీ ప్రధాని తరఫు నుంచి మాత్రం ఎలాంటి స్పందన వస్తున్నదో సామాన్యులకు తెలియడం లేదు. కానీ కేసీఆర్‌ ఇలా ఢిల్లీ వెళ్లి ప్రధానితో సమావేశం అయ్యారో లేదో.. మిషన్‌ భగీరథ గురించి, మిషన్‌ కాకతీయ గురించి ముఖ్యమంత్రి కేసీఆర్‌ గారు తనకు వివరించి చెప్పారంటూ ప్రధానమంత్రి ట్వీట్లు పెట్టడం విశేషం.
మోడీ లో క్రమంగా గులాబీ ప్రేమ వెల్లి విరుస్తున్నదా అనే అనుమానాలను రాజకీయ నాయకులు వ్యక్తం చేస్తున్నారు. ఒక దేశానికి ప్రధాని అన్న తరువాత.. అన్ని రాష్ట్రాలు లేదా అన్ని ప్రాంతాల మీద సమానమైన వ్యవహార సరళిని కనబరచాలి. కానీ తెలంగాణ ముఖ్యమంత్రి కేసీఆర్‌ తాజా పర్యటనలో ఆయనకు ఎక్కువ ప్రాధాన్యం దక్కిందేమో అనే అభిప్రాయం పలువురిలో వ్యక్తం అవుతోంది. గంటన్నరపాటు ప్రధానితో సమావేశం సీరియస్‌గా జరగడం మాత్రమే కాదు… భేటీ ముగిసిన తర్వాత కేసీఆర్‌ ప్రెస్‌మీట్‌ ద్వారా వివరాలు వెల్లడిస్తే, మోడీ ట్వీట్‌ల ద్వారా కేసీఆర్‌ తనకు చెప్పిన వివరాలను తెలంగాణ సాధిస్తున్న పురోగతి క్రమాన్ని ప్రపంచానికి చెప్పడం విశేషం.
నిజానికి లెక్కకు మిక్కిలిగా ఢిల్లీ వెళ్తున్న చంద్రబాబునాయుడు కూడా అమరావతి దగ్గరినుంచి, పట్టిసీమ వరకు ఏపీలో చేపడుతున్న అన్ని పనుల గురించి మోడీకి వివరిస్తూనే ఉన్నారని… అయితే ఏనాడూ వాటి గురించిన పురోగతి తన దృష్టికి వచ్చినట్లుగా మోడీ ట్వీట్‌ చేయడం జరగలేదని ఓ తెలుగుదేశం నాయకుడు వ్యాఖ్యానించడం విశేషం.
అమరావతి, పట్టిసీమ లేదా పోలవరం వంటి వాటి విషయంలో ఎప్పటికప్పుడు తనకు వివరాలు తెలుస్తున్నప్పటికీ వాటి గురించి కామెంట్‌ చేయడం మోడీ కి ఇష్టం ఉండకపోవచ్చునని ఇప్పుడు కొందరు నాయకులు విశ్లేషిస్తున్నారు. వాటి గురించి ట్వీట్‌చేస్తే ఏపీ పట్ల తన జవాబుదారీతనం పెరిగిపోతుందని, దాని నుంచి తప్పించుకోవడానికి అసలేమీ తెలియనట్లుగా, పట్టనట్లుగా మోడీ వ్యవహరిస్తుంటారని కొందరు ఆరోపణలు గుప్పిస్తున్నారు.
