• తెంచుకోవద్దు – అలాగని ఊరుకోవద్దు
తెలుగుదేశం పట్ల బిజెపి వైఖరి
• కేంద్రాన్ని బాబు ప్రత్యేకహోదా అడగనేలేదు!

 

తెలుగుదేశంతో మిత్రబంధాన్ని సాగిస్తూనే ఆంధ్రప్రదేశ్ అభివృద్ధికి కేంద్రప్రభుత్వం ఏమేమి చేస్తోందో ఎప్పటికప్పుడు ప్రజల్లోకి తీసుకువెళ్ళాలని బిజెపి రాష్ట్ర కోర్ కమిటీ నిర్ణయించింది. విజయవాడలో శుక్రవారం మూడుగంటల పాటు కమిటీ సమావేశమైంది.

ప్రత్యేక హోదాపై ఆందోళనలు-బీజేపీ వైఖరి, కేంద్ర, రాష్ట్ర సంబంధాలపై ఈ భేటీలో ప్రధానంగా చర్చించారు. బిజెపి – ఎపి ఇన్‌చార్జ్ సిద్ధార్థనాథ సింగ్, మంత్రులు మాణిక్యాలరావు, కామినేని శ్రీనివాస్, బీజేపీ నేతలు హరిబాబు, విష్ణురాజు, సోము వీర్రాజు, పురందేశ్వరి, కావూరి సాంబశివరావు, కన్నా లక్ష్మీనారాయణ ఈ సమావేశానికి హాజరయ్యారు.

టీడీపీ రాజకీయ ఎత్తుగడలకు బిజెపి నష్టపోతోందని సమావేశం దాదాపు ఏకగ్రీవంగా భావించింది. విభజన చట్టంలోని అంశాలను అమలు చేయాలని చంద్రబాబు కేంద్రానికి లేఖలు రాశారని…. ఆ లేఖల్లో ఎక్కడా ప్రత్యేక హోదా అంశం ప్రస్తావించలేదని సమావేశంలో సిద్ధార్థనాథ సింగ్ స్పష్టం చేశారని తెలిసింది.

కేంద్రం ఇచ్చిన నిధుల వివరాలు, వాటికి రాష్ట్రం లెక్కలు చెప్పని వైనాన్ని ప్రజల్లోకి తీసుకువెళ్ళడమే ప్రస్తుతానికి ప్రత్యేక హోదాపై అన్ని పార్టీల విమర్శలకు, తెలుగుదేశం రాజకీయాలకు సమాధానమని కోర్ కమిటీ అభిప్రాయపడినట్టు తెలిసింది.

వైఎస్ఆర్ కాంగ్రెస్ ఎమ్మెల్యేలను ఫిరాయింపజేసుకునే తెలుగుదేశం అనైతిక రాజకీయాల ప్రభావం బిజెపి మీద కూడా పడుతుందని సోము వీర్రాజు ప్రస్తావించగా ఇన్ చార్జ్ సూచనపై తెలుగుదేశం ఆంతరంగిక విషయాలలోకి మనంపోవద్దని సమావేశం అభిప్రాయపడింది. అయితే దీనిపై సగంమంది మౌనంగానే వుండిపోయారని తెలిసింది.

ఏపీకి ప్రత్యేక హోదా ఇవ్వడం సాధ్యం కాదని రాష్ట్ర బీజేపీ నేతలకు సిద్దార్థనాథ్‌సింగ్ తేల్చిచెప్పారు. హోదా కంటే ఎక్కవ మేలే జరుగుతుందన్నారు. కేంద్ర నిధుల వివరాలను రాష్ట్ర ప్రభుత్వం చెప్పడం లేదని కొందరు నేతలు ఆరోపించారు. అయితే కేంద్రం చేసిన సాయాన్ని ప్రజల్లోకి తీసుకెళ్లాలని, టీడీపీతో మిత్ర బంధం కొనసాగిస్తూనే రాష్ట్రాభివృద్ధికి బీజేపీ ఏం చేసిందో ప్రజలకు చెప్పాలని సమావేశంలో నిర్ణయించారు.

ప్రత్యేక హోదాను తిరస్కరించింది కాంగ్రెస్ నియమించిన 14వ ఆర్థిక సంఘమే అని వివరిస్తూ ఏపీకి త్వరలో ప్రత్యేక ప్యాకేజీ ప్రకటించే అవకాశం ఉందని సిద్దార్థనాథ్‌సింగ్ సమావేశంలో చెప్పారని తెలిసింది.

తెలుగుదేశంతో సంబంధాలపై బిజెపి రాష్ట్రనాయకుల్లో పెరుగుతున్న వ్యతిరేకతను ”ప్రస్తుతానికి సముదాయించడమే” ఈ సమావేశపు సారాంశమని అర్ధమౌతోంది. అయితే, ప్రత్యేక హోదా, ఎపి క సహాయం మాట వచ్చిన ప్రతీ సారీ ”మేము ఇంతింత ఇచ్చాము – దానికి ఎప్పుడు లెక్క చెబుతారు” అనే సమాధానాన్ని నేరుగా ప్రజల్లోకే తీసుకు వెళ్ళాలన్నది కూడా తెలుగుదేశాన్ని డిఫెన్స్ లో పెట్టాలన్న పెద్ద అడుగే! ఆనిర్ణయానికి కూడా బిజెపి ఎపి కోర్ కమిటి శుక్రవారపు సమావేశమే వేదిక అయ్యింది!