క్లాస్ చిత్రాల ద‌ర్శ‌కుడిగా బ్రాండ్‌తెచ్చుకొన్నాడు శ్రీ‌కాంత్ అడ్డాల‌. ఆయ‌న సినిమా అంటే ఓ ఎమోష‌న‌ల్ జ‌ర్నీ. కొత్త బంగారు లోకం, సీత‌మ్మ వాకిట్లో, ముకుంద… వీటిలో అదే చూపించారు. ఇప్పుడు బ్ర‌హ్మోత్స‌వం కూడా దానికి అతీతం కాదు. బ్ర‌హ్మోత్స‌వం రెండ్రోజుల్లో ప్రేక్ష‌కుల ముందుకు రాబోతోంది. త‌ర‌వాత శ్రీ‌కాంత్ అడ్డాల ప్రాజెక్ట్ ఏంటి? హీరో ఎవ‌రు? ఈ విష‌యాల‌పై ఇంకా క్లారిటీ రాలేదు. అయితే విశ్వ‌స‌నీయ వ‌ర్గాల స‌మాచారం ప్ర‌కారం శ్రీ‌కాంత్ అడ్దాల త‌న త‌దుప‌రి ప్రాజెక్టు గీతా ఆర్ట్స్‌లో చేయ‌బోతున్నాడు.

సీత‌మ్మ వాకిట్లో .. స‌మయంలోనే గీతా ఆర్ట్స్ నుంచి శ్రీ‌కాంత్ అడ్డాల అడ్వాన్స్ తీసుకొన్న‌ట్టు తెలుస్తోంది. బ్ర‌హ్మోత్స‌వం త‌ర‌వాత ఆయ‌న సినిమా గీతా ఆర్ట్స్‌లో ఉండ‌డం ఖాయం. ఆ సినిమా అల్లు అర్జున్ తోనే అయ్యే అవ‌కాశాలున్నాయి. సినిమా సినిమాకీ ఓ కొత్త జోన‌ర్‌లో వెళ్తున్నాడు బ‌న్నీ. స‌రైనోడుతో మాస్‌ని ఆక‌ట్టుకొన్నాడు. ఇప్పుడు త‌న‌కు ఫ్యామిలీ డ్రామాలపై ఆస‌క్తి క‌లుగుతోంది. దానికి స‌రైన వ్య‌క్తి.. శ్రీ‌కాంత్ అడ్డాల‌. అందుకే ఈ కాంబినేష‌న్ సెట్ట‌య్యే అవ‌కాశాలు క‌నిపిస్తున్నాయి. ఒక వేళ బ‌న్నీ కాక‌పోయినా.. క‌చ్చితంగా మెగా హీరోతోనే శ్రీ‌కాంత్ నెక్ట్స్ ప్రాజెక్ట్ అన్న‌ది క‌న్‌ఫామ్ అయిపోయింది.