ఇటీవ‌ల జ‌రిగిన త‌మిళ‌నాడు ఎన్నిక‌ల్లో గెలిచి, ముఖ్య‌మంత్రిగా మ‌రోసారి పీఠాన్నెక్కి సంచ‌ల‌నం సృష్టించింది జ‌య‌ల‌లిత‌. ఈ గెల‌పు.. మామూలు గెలుపు కాదు. ఎగ్జిట్ పోల్స్‌కే షాకిచ్చిన‌.. గెలుపు. అంద‌రి అంచ‌నాల‌నూ త‌ల‌కిందులు చేసిన గెలుపు. అందుకే దేశ వ్యాప్తంగా ప్ర‌ముఖులు ఆమెకు ప్ర‌శంస‌లు అందుతున్నాయి. సినీ, రాజ‌కీయ‌, వ్యాపార‌ ప్ర‌ముఖులు ఆమెకు శుభాకాంక్ష‌లు అందిస్తున్నారు. జూ.ఎన్టీఆర్ కూడా జ‌య‌ల‌లిత‌ను వ్య‌క్తిగ‌తంగా క‌ల‌వ‌బోతున్నాడ‌ని, ఆమెకు విషెష్ చెప్పి వ‌స్తాడ‌ని ప్ర‌చారం జ‌రుగుతోంది. ఎన్టీఆర్ జ‌య‌ల‌లితను క‌లుసుకోవ‌డానికి ఆపాయింట్‌మెంట్ కూడా తీసుకొన్నాడ‌ని, ఒక‌ట్రెండు రోజుల్లో అమ్మ‌ని క‌లుస్తాడ‌ని చెప్పుకొంటున్నారు. జ‌న‌తా గ్యారేజ్ షూటింగ్ నిమిత్తం ఎన్టీఆర్ చెన్నైలో ఉండ‌డంతో ఈ వార్త కు మ‌రింత బ‌లం చేకూరింది.

అయితే.. ఈ వార్త‌లో ఎంత‌మాత్రం నిజం లేద‌ట‌. జ‌య‌ల‌లిత‌ను ఎన్టీఆర్ క‌లుసుకొనే పోగ్రాం ఏమీ లేద‌ని, అస‌లు అపాయింట్‌మెంటే తీసుకోలేద‌ని ఎన్టీఆర్ పీఆర్ వ‌ర్గం డిక్లేర్ చేసింది. ఆ వార్త‌ల‌న్నీ క‌ల్పితాల‌ని తేల్చి చెప్పింది. ఎన్టీఆర్ దృష్టి ఇప్పుడు జ‌న‌తా గ్యారేజ్ షూటింగ్ మీదే ఉంద‌ని, మ‌రో విష‌యం ఆలోచించ‌డం లేద‌ని ఎన్టీఆర్ కాంపౌండ్ వ‌ర్గాలు ధృవీక‌రించాయి. సో.. అమ్మ‌ను క‌లుసుకోవ‌డానికి ఎన్టీఆర్ వెళ్లడం లేద‌న్న‌మాట‌.