ప్ర‌భాస్‌ని క్లాస్‌గా, మాస్‌గా, ఫ్యామిలీమెన్‌గా.. ప్ర‌భాస్‌లో ఎన్ని ర‌కాల కోణాలుంటే అన్నిర‌కాలుగా చూపించిన సినిమా మిర్చి. అందుకే ప్ర‌భాస్ ఫ్యాన్స్‌కి ఆ సినిమా పిచ్చ‌పిచ్చ‌గా న‌చ్చేసింది. ఆ సినిమాతోనే కొర‌టాల శివ క్రేజీ ద‌ర్శ‌కుడైపోయాడు. మ‌ళ్లీ ఈ కాంబినేష‌న్‌ని చూసే అవ‌కాశం ఉందా? మ‌ర్చికి కొన‌సాగింపుగా మ‌రో సినిమా రాబోతోందా? ఔన‌నే అంటున్నాయి టాలీవుడ్ వ‌ర్గాలు. ప్ర‌భాస్ – కొర‌టాల – యూవీ క్రియేష‌న్స్ కాంబినేష‌న్‌లో మ‌రో సినిమా తెర‌కెక్కించ‌డానికి స‌న్నాహాలు జ‌రుగుతున్నాయ‌ని టాక్‌. బాహుబ‌లి 2 త‌ర‌వాత వ‌రుస‌గా సినిమాలు చేయ‌డానికి ప్ర‌భాస్ స‌న్నాహాలు చేసుకొంటున్నాడు. సుదీప్ క‌థ‌ని ఆల్రెడీ ఓకే చేసిన ప్ర‌భాస్‌.. అదే దారిలో మ‌రిన్ని క‌థ‌ల్ని రెడీ చేసుకొనే ప‌లిలో ప‌డ్డాడు. అందులో భాగంగానే కొర‌టాల‌తో సినిమా ఓకే చేసిన‌ట్టు తెలుస్తోంది.

ఇదే విష‌యాన్ని ప్ర‌భాస్ స‌న్నిహితుల‌తో చ‌ర్చించింద తెలుగు 360 డాట్ కామ్‌. ”కొర‌టాల – ప్ర‌భాస్ ఈ కాంబినేష‌న్ త‌ప్ప‌కుండా ఉంటుంది. మార్చి త‌ర‌వాత మ‌రో సినిమా చేయాల‌ని అనుకొన్నారు. అయితే వీరిద్ద‌రి సినిమా ఎప్పుడ‌న్న‌ది ఇప్పుడే చెప్ప‌లేం. క‌థ కూడా సెట్ అవ్వాలి క‌దా. అయితే అది మిర్చి 2నా, కొత్త క‌థ అన్న‌ది తెలీదు. క‌థ ఏదైనా స‌రే.. ఈసారి ఘాటు మ‌రింత టేస్టుగా ఉంటుంద‌”న్నారు.అంటే.. ఈ కాంబినేష‌న్ మ‌రోసారి రిపీట్ అవ్వ‌డం ఖాయ‌మ‌న్న‌మాట‌.