ఈమ‌ధ్య టాలీవుడ్ లో ఓ మంచి సంప్ర‌దాయం క‌నిపిస్తోంది. చిన్న హీరోల్ని బ‌డా స్టార్లు గ‌ట్టిగానే ప్రోత్స‌హిస్తున్నారు. వాళ్ల సినిమాల ప్రమోషన్లలో పాలు పంచుకొంటున్నారు. భేష‌జాలు లేకుండా భుజం భుజం క‌లుపుతున్నారు. ఈ విషయంలో అల్లు అర్జున్ అంద‌రి కంటే కాస్త ముందే ఉంటాడు. ‘మారుతి న‌గర్ సుబ్ర‌మ‌ణ్యం’ ప్రమోషన్లలో అల్లు అర్జున్ పాల్గొన్న సంగ‌తి గుర్తుండే ఉంటుంది. ఇప్పుడు కిర‌ణ్ అబ్బ‌వ‌రం సినిమాకీ త‌న వంతు స‌పోర్ట్ అందిస్తున్నాడు.
కిర‌ణ్ అబ్బ‌వ‌రం క‌థానాయ‌కుడిగా ‘క’ అనే సినిమా రూపుదిద్దుకొంటున్న సంగ‌తి తెలిసిందే. ఈ సినిమా షూటింగ్ రామోజీ ఫిల్మ్ సిటీలో జ‌రుగుతోంది. ఆ ప‌క్క‌నే ‘పుష్ష 2’ షూటింగ్ కూడా న‌డుస్తోంది. షాట్ గ్యాప్‌లో బ‌న్నీ… ‘క’ సెట్లో ప్ర‌త్య‌క్ష‌మ‌య్యాడు. కిర‌ణ్‌తో పాటు టీమ్ కి త‌న బెస్ట్ విషెష్ చెప్పాడు. ‘క’ టీజ‌ర్ బ‌న్నీకి బాగా న‌చ్చింద‌ట. ఆ టీజ‌ర్ గురించి కూడా కాసేపు మాట్లాడాడ‌ని తెలుస్తోంది. బ‌న్నీ లాంటి స్టార్ హీరో సెట్లోకి వ‌స్తే ఆ వైబ్రేష‌న్ వేరేలా ఉంటుంది. ‘క’ సెట్లో అదే క‌నిపించింది. బ‌న్నీ మాట‌లు బూస్ట‌ప్ ఇచ్చాయ‌ని, ఓ బ‌డా స్టార్ త‌మ సెట్ కి వ‌చ్చి శుభాకాంక్ష‌లు తెల‌ప‌డం ఆనంద‌క‌ర‌మైన విష‌య‌మ‌ని ‘క’ టీమ్ సంతోషిస్తోంది. సో.. భ‌విష్య‌త్తులో ‘క’ ప్రమోషన్లలో బ‌న్నీ క‌నిపించినా ఆశ్చ‌ర్య‌పోవాల్సిన ప‌నిలేదు. కిర‌ణ్ కెరీర్‌లోనే భారీ బ‌డ్జెట్ తో రూపొందుతున్న సినిమా ‘క’. షూటింగ్ పూర్త‌య్యింది. టీజ‌ర్ విడుద‌లైన త‌ర‌వాత ప్రీ రిలీజ్ బిజినెస్ కూడా మొద‌లైపోయింది. ఈ సినిమాపై మంచి అంచ‌నాలే ఏర్ప‌డ్డాయి.
