వ‌రుణ్ తేజ్ ప్ర‌స్తుతం ‘మ‌ట్కా’ సినిమా చేస్తున్నాడు. షూటింగ్ పూర్తి కావొచ్చింది. విడుద‌ల‌కు సిద్ధ‌మైంది. టీజ‌ర్ కూడా ప్రేక్ష‌కుల ముందుకు తీసుకొస్తున్నారు. ఆ త‌ర‌వాత వ‌రుణ్ చేయ‌బోయే సినిమా కూడా దాదాపుగా ఫిక్స‌య్యింది. మేర్ల‌పాక గాంధీ ద‌ర్శ‌కత్వంలో ఓ సినిమా చేస్తున్నాడు వ‌రుణ్‌. యూవీ క్రియేష‌న్స్ నిర్మించ‌నుంది. ఈ సినిమాకు ‘క‌న‌క‌రాజు’ అనే టైటిల్ ఫిక్స్ చేశార‌ని తెలుగు 360 ముందే చెప్పింది. అయితే ఇది ఉత్తి క‌న‌క‌రాజు కాద‌ట‌. ‘కొరియ‌న్ క‌న‌క‌రాజు’ అట‌. కొంత భాగం కొరియాలోనూ, మ‌రికొంత భాగం రాయ‌ల‌సీమ‌లోనూ తెర‌కెక్కించ‌నున్నార‌ని తెలుస్తోంది. యాక్ష‌న్‌కి పెద్ద పీట వేసే ఈ క‌థ ఓ వెరైటీ కాన్సెప్ట్ చుట్టూ తిర‌గ‌బోతోంద‌ని తెలుస్తోంది.

కొరియ‌న్ సినిమాల ప్ర‌భావం మ‌న సినిమాల‌పై చాలా ఎక్కువ‌గా ఉంది. ఆ భాష అర్థం కాక‌పోయినా స‌బ్ టైటిల్స్ పెట్టుకొని మ‌రీ ఆ సినిమాల్ని చూసేస్తున్నారు. కొరియ‌న్ సినిమాలూ, సిరీస్‌ల‌లోని కొన్ని ఎపిసోడ్లు మ‌న‌వాళ్లు ఎత్తుకొచ్చేసిన సంద‌ర్భాలూ ఉన్నాయి. అలాంటిది ఇప్పుడు కొరియ‌న్ నేప‌థ్యంలోనే ఓ సినిమా చేయ‌బోతున్నారు. ఈ ద‌స‌రాకు ఈ చిత్రానికి సంబంధించిన ఓ కీల‌క‌మైన అప్ డేట్ రాబోతోంద‌ని స‌మాచారం.