నిఖిల్ హీరోగా శ్రీ వెంక‌టేశ్వ‌ర సినీ చిత్ర ఓ చిత్రాన్ని రూపొందిస్తోంది. సుధీర్ వ‌ర్మ ద‌ర్శ‌కుడు. ఈ చిత్రానికి ‘అప్పుడో ఇప్పుడో ఎప్పుడో’ అనే టైటిల్ ఫిక్స్ చేశారు. సిద్దార్థ్ ‘బొమ్మ‌రిల్లు’లో ఓ సూప‌ర్ హిట్ గీతంలోని ప‌ల్ల‌వి ఇది. ఇప్పుడు టైటిల్ గా మారింది. ఈ రోజు ఫ‌స్ట్ లుక్ తో పాటుగా టైటిల్ రివీల్ చేశారు. టైటిల్ రొమాంటిక్ గా ఉన్నా – సినిమా క్రైమ్ కామెడీ నేప‌థ్యంలో సాగుతుంద‌ని టాక్‌. ఈ దీపావ‌ళికి ఈ చిత్రాన్ని విడుద‌ల చేస్తారు.

సుధీర్ వ‌ర్మ ‘రావ‌ణాసుర‌’ అనే ఓ సినిమా తీసిన సంగ‌తి తెల‌సిందే. దాని కంటే ముందే… ప‌ట్టాలెక్కిన చిత్ర‌మిది. ఈ సినిమా అయ్యాకే.. ‘రావ‌ణాసుర‌’ ప‌నులు మొద‌ల‌య్యాయి. అయితే ‘రావ‌ణాసుర‌’ ముందు విడుద‌లైంది. నిఖిల్ సినిమాకు ఇప్పుడు మోక్షం ద‌క్కింది. ‘స్వామి రారా’తో సుధీర్ వ‌ర్మ ప్ర‌యాణం మొద‌లైంది. నిఖిల్ కు ఆ సినిమా మంచి బ్రేక్ ఇచ్చింది. ఆ త‌ర‌వాత నిఖిల్ వెన‌క్కి తిరిగి చూసుకోలేదు. ఇప్పుడు పాన్ ఇండియా స్టార్ అయ్యాడు. అయితే సుధీర్ వ‌ర్మ‌కు మాత్రం ఓ హిట్టు అత్య‌వ‌స‌రం. మ‌రోసారి నిఖిల్ సినిమాతో త‌న కెరీర్ గాడిలో ప‌డుతుందేమో చూడాలి.