ర‌వితేజకు ఈమ‌ధ్య‌కాలంలో వ‌చ్చిన ఏకైక హిట్టు… ధ‌మాకా. ఈ సినిమా వంద కోట్ల క్ల‌బ్ లో చేరింది. న‌క్కిన త్రినాథ‌రావుపై టాలీవుడ్ లో హీరోల‌కు న‌మ్మ‌కం మ‌రింత పెరిగింది. ఇప్పుడు న‌క్కిన ‘మ‌జాకా’ తీస్తున్న సంగ‌తి తెలిసిందే. సందీప్ కిష‌న్ హీరో. ఈ సంక్రాంతి బ‌రిలో ఉన్న సినిమాల్లో అదొక‌టి. ‘మ‌జాకా’ త‌ర‌వాత న‌క్కిన త్రినాథ‌రావు ర‌వితేజ‌తో ఓ మ‌రో సినిమా చేయ‌బోతున్న‌ట్టు టాక్ వినిపిస్తోంది. అందుకు సంబంధించిన క‌థ కూడా సిద్ధం చేసుకొన్న‌ట్టు తెలుస్తోంది. నిజానికి ‘ధ‌మాకా’ విడుద‌లైన వెంట‌నే న‌క్కిన తో మ‌రో సినిమా చేయ‌డానికి ర‌వితేజ ఆస‌క్తి చూపించారు. అయితే.. ర‌వితేజ చేతిలో అప్ప‌టికే చాలా సినిమాలున్నాయి. మ‌రోవైపు న‌క్కిన త్రినాథ‌రావు కూడా వేరే నిర్మాత‌ల దగ్గ‌ర అడ్వాన్సులు తీసుకొన్నారు. అందుకే… ర‌వితేజ‌తో సినిమా ఆల‌స్య‌మైంది. అయితే ‘మజాకా’ పూర్త‌యిన వెంట‌నే ర‌వితేజ‌తో సినిమా ఉండ‌బోతోంద‌ని ఇన్ సైడ్ వ‌ర్గాలు చెబుతున్నాయి. ‘ధ‌మాకా’ స‌మయంలోనే ర‌వితేజ‌కు మ‌రో లైన్ చెప్పి ‘ఓకే’ చేయించుకొన్నాడు న‌క్కిన‌. ‘మ‌జాకా’ ప‌నులు ఓ వైపు జ‌రుగుతున్నా, మ‌రో రైటింగ్ టీమ్ తో ర‌వితేజ క‌థ‌పై క‌స‌ర‌త్తులు చేయిస్తున్న‌ట్టు టాక్‌.

ప్ర‌స్తుతం ర‌వితేజ సితార ఎంట‌ర్‌టైన్‌మెంట్స్ లో ఓ సినిమా చేస్తున్న సంగ‌తి తెలిసిందే. ఇటీవ‌ల ర‌వితేజ‌కు ఆప‌రేష‌న్ జ‌ర‌గ‌డం వ‌ల్ల‌, ఆ సినిమా షూటింగ్ ఆల‌స్య‌మ‌వుతోంది. అయితే ఫిబ్ర‌వ‌రి, మార్చ్ నాటికి ర‌వితేజ సినిమా షూటింగ్ పూర్త‌య్యే అవ‌కాశాలు ఉన్నాయి. వేస‌విలో ర‌వితేజ సినిమా విడుద‌ల అవుతుంది. ఆ త‌ర‌వాత న‌క్కిన సినిమా ప‌ట్టాలెక్కుతుంది. ఈలోగా న‌క్కిన ‘మ‌జాకా’ కూడా వ‌చ్చేస్తుంది.