‘దేవ‌ర’ హ‌డావుడి అయిపోయింది. ఇప్పుడుంతా ‘వార్ 2’పై ఫోక‌స్ చేశారు. హృతిక్ రోష‌న్‌తో ఎన్టీఆర్ క‌లిసి న‌టిస్తున్న సినిమా ఇది. ఎన్టీఆర్ పై కొన్ని స‌న్నివేశాల్ని తెర‌కెక్కించారు. ఇప్పుడు మ‌రో కొత్త షెడ్యూల్ కోసం ఎన్టీఆర్ ముంబై వెళ్లిపోయాడు. ఈసారి హృతిక్, ఎన్టీఆర్‌ల‌పై ఓ పాట చిత్రీక‌రించ‌బోతున్న‌ట్టు వార్త‌లొస్తున్నాయి. ఈ పాట… ఇండియ‌న్ స్క్రీన్‌పై న‌భూతో.. న భ‌విష్య‌త్ అనుకొనే రీతిలో ఉండ‌బోతున్న‌ట్టు టాక్. ఎన్టీఆర్, హృతిక్ ఇద్ద‌రూ గొప్ప డాన్స‌ర్లే. కాబ‌ట్టి, వాళ్ల‌పై రూపొందించే పాట కూడా అంతే గొప్ప‌గా ఉంటుంద‌న‌డంలో ఎలాంటి సందేహం లేదు.
అయితే ఇప్పుడు ‘వార్ 2’ కోసం మ‌రో కొత్త వార్త చ‌క్క‌ర్లు కొడుతోంది. ఈ సినిమాకు తెలుగులో ఓ కొత్త టైటిల్ నిర్ణ‌యించే అవ‌కాశాలు ఉన్న‌ట్టు తెలుస్తోంది. ‘యుద్ధ‌భూమి’ అనే టైటిల్ ‘వార్ 2’ కోసం రిజిస్ట‌ర్ చేయించార‌ని కూడా వార్త‌లొస్తున్నాయి. ‘యుద్ద‌భూమి’ అనేది కొత్త టైటిల్ ఏం కాదు. గ‌తంలో చిరంజీవి హీరోగా న‌టించిన ఓ చిత్రానికి ఈ పేరు పెట్టారు.
ఈమ‌ధ్య పాన్ ఇండియా సినిమాల‌కు దేశ వ్యాప్తంగా ఒకే టైటిల్ చ‌లామ‌ణీలో ఉంటోంది. ఒకే టైటిల్ ఉంటే, అన్ని భాష‌ల్లోనూ త్వ‌ర‌గా రీచ్ అవుతుంద‌న్న‌ది ద‌ర్శ‌క నిర్మాత‌ల ఆలోచ‌న. అందుకే కొన్ని త‌మిళ సినిమాలు త‌మిళ టైటిల్ తోనే దేశ వ్యాప్తంగా విడుద‌ల అవుతున్నాయి. ఇలాంటి త‌రుణంలో ‘వార్ 2’ కోసం తెలుగులో వేరే టైటిల్ పెడ‌తారా? అనేది ప్ర‌శ్నార్థ‌క‌మే. పైగా ‘వార్’ అనేది సూప‌ర్ హిట్ సినిమా. ఆ టైటిల్ కి రీచ్ ఎక్కువ‌గా ఉంటుంది. ‘వార్’ అనేది అంద‌రికీ అర్థ‌మయ్యే మాటే. కాబ‌ట్టి టైటిల్ మార్చే అవ‌కాశాలు లేవ‌న్న‌ది మ‌రో వ‌ర్గం వాద‌న. మ‌రి ‘వార్ 2’ ద‌ర్శ‌క నిర్మాత‌ల మైండ్ లో ఏముందో చూడాలి.
