ప్రశాంత్ నీల్ కథ అందించిన సినిమా ‘బఘీర’. హోంబలే ఫిలింస్ నిర్మాణం. ‘ఉగ్రమ్’ ఫేమ్ శ్రీమురళి హీరో. ట్రైలర్ లో లార్జర్ దెన్ లైఫ్ కంటెంట్ కనిపించింది. నిజానికి ఇంత బ్యాకింగ్ తో వచ్చే సినిమాని ప్రమోట్ చేసేటప్పుడు ఒకటికి నాలుగు కలిపి చెబుతారు. అయితే ఈ సినిమా విషయంలో హీరో శ్రీమురళి చాలా లో ప్రొఫైల్ మెంటైన్ చేస్తున్నాడు. ఈ రోజు తెలుగు ప్రమోషన్స్ లో పాల్గొన్న ఆయన మీడియా ముఖంగా అందరికీ ఒక రిక్వెస్ట్ చేశాడు.

‘ఈ సినిమాకి బ్లాంక్ మైండ్ తో రండి, ఎలాంటి అంచనాలు పెట్టుకోవద్దు. నన్ను ఒక కొత్త ఆర్టిస్ట్ గానే చూడండి. ఇదే నా తొలి సినిమాగా భావించండి. మంచి సినిమా తీశాం. అది మాత్రమే చెప్పగలను. అంతకుమించి ఈ సినిమా గురించి ఎక్కువ మాట్లాడను. మీరు చూసి ఓ న్యూ బోర్న్ యాక్టర్ ని బ్లెస్ చేసినట్లు నన్నూ బ్లెస్ చేయండి’ అని కోరారు.

నిజానికి ఇప్పటివరకూ శ్రీమురళి నుంచి ఒక్క కన్నడ సినిమా కూడా తెలుగులో రాలేదు. ఇదే ఆయన తొలి తెలుగు రిలీజ్. అయితే ఉగ్రమ్ సినిమాతో ఆయన ఇక్కడ ప్రేక్షకులకి పరిచయం. ఆ సినిమా లైన్ తో ప్రభాస్ తో సలార్ సినిమాని చేశారు ప్రశాంత్ నీల్. ఆ రకంగా చాలా మందికి శ్రీమురళి తెలుసు. ఆయనకి యాక్షన్ హీరో ఫేం వుంది. అయినప్పటికీ ఎలాంటి అంచనాలు లేకుండా సినిమా చూడమని కోరడం ఒక విధంగా మంచిదే. అక్టోబర్ 31న ఈ సినిమా విడుదల కానుంది.