సినిమాకు ఎల్ల‌ల్లేవు ఇప్పుడు. టాలీవుడ్, బాలీవుడ్ అనే హ‌ద్దులు చెరిగిపోయాయి. మ‌ల్టీస్టార‌ర్ అనే ప‌దానికి సరికొత్త నిర్వ‌చ‌నం ఇస్తున్నారు సినిమావాళ్లు. ఓ టాలీవుడ్ హీరో బాలీవుడ్ స్టార్‌తో క‌లిసి సినిమా చేయ‌డం, దానికి పాన్ ఇండియా ఇమేజ్ రావ‌డం చాలా సాధార‌ణ‌మైన విష‌యం అయిపోయింది. అయితే కొన్ని క‌ల‌యిక‌లు మాత్రం అబ్బుర ప‌రుస్తున్నాయి. టాక్ ఆఫ్ ది ఇండ‌స్ట్రీ అవుతున్నాయి. అలాంటి క‌ల‌యిక ఎన్టీఆర్ – హృతిక్ రోష‌న్‌. వీరిద్ద‌రూ ‘వార్ 2’లో క‌లిసి న‌టిస్తున్న సంగ‌తి తెలిసిందే. ‘దేవ‌ర‌’ త‌ర‌వాత ఈ సినిమా కోసం కొన్ని కాల్షీట్లు కేటాయించాడు ఎన్టీఆర్‌. ఇది వ‌ర‌కే `వార్ 2`కి సంబంధించిన కొంత మేర చిత్రీక‌ర‌ణ జ‌రిగింది. ఇప్పుడు మ‌రో ద‌ఫా చిత్రీక‌ర‌ణ ప్రారంభ‌మైంది. ఎన్టీఆర్‌, హృతిక్ ల‌పై ఈసారి యాక్ష‌న్ దృశ్యాల‌తో పాటు ఓ పాట‌ని తెర‌కెక్కించ‌నున్నార‌ని స‌మాచారం.

అయితే ‘వార్ 2’కి సంబంధించిన మ‌రో ఆస‌క్తిక‌ర‌మైన విష‌యం ఒక‌టి వెలుగులోకి వ‌చ్చింది. ఈ సినిమాలో షారుఖ్ ఖాన్ కూడా న‌టించబోతున్నాడ‌ని ముంబై వ‌ర్గాలు చెబుతున్నాయి. షారుఖ్ ఓ యాక్ష‌న్ ఎపిసోడ్ లో కనిపిస్తాడ‌ని, అందులో షారుఖ్ ‘ప‌ఠాన్’ లుక్ లో ఉంటాడ‌న్న‌ది టాక్‌. అంతేకాదు.. ఎన్టీఆర్‌, హృతిక్‌, షారుఖ్ ఈ ముగ్గురూ ఒకే ఫ్రేమ్‌లో క‌నిపిస్తార‌ని తెలుస్తోంది. అదే జ‌రిగితే… థియేట‌ర్లో అభిమానుల‌కు పూన‌కాలు రావ‌డం ఖాయం. షారుఖ్ కు గెస్ట్ రోల్ లో ఎంట్రీ ఇవ్వ‌డం, త‌న అభిమానుల్ని అల‌రించ‌డం బాగా స‌ర‌దా. అందులో భాగంగానే ఈ గెస్ట్ రోల్ కు ‘ఓకే’ చేశాడ‌ని తెలుస్తోంది. ఆయ‌న్ ముఖ‌ర్జీ ద‌ర్శ‌క‌త్వం వ‌హిస్తున్న ఈ చిత్రం వ‌చ్చే యేడాది ప్రేక్ష‌కుల ముందుకు రాబోతోంది.