పిరియాడిక్ డ్రామాల పుణ్య‌మా అని రెట్రో స్టైల్ ని చూసే అవ‌కాశం ప్రేక్ష‌కుల‌కు అప్పుడ‌ప్పుడూ ద‌క్కుతోంది. వ‌రుణ్ తేజ్ చేస్తున్న ‘మ‌ట్కా’ కూడా పిరియాడిక్ యాక్ష‌న్ డ్రామానే. క‌రుణ కుమార్ ద‌ర్శ‌క‌త్వం వ‌హించిన ఈ చిత్రం న‌వంబ‌రు 14న విడుద‌ల అవుతోంది. ఈలోగా ప్ర‌మోష‌న్ కార్య‌క్ర‌మాల్ని సైతం ముమ్మ‌రం చేశారు. ఈ సినిమా నుంచి ‘త‌స్సాదియ్యా’ అనే పాట‌ని ఈరోజు విడుద‌ల చేశారు. జి.వి.ప్ర‌కాష్ కుమార్ సంగీతాన్ని అందించారు. మ‌నో ఆల‌పించారు. భాస్క‌ర‌భ‌ట్ల ర‌వికుమార్ ఈ పాట ర‌చించారు. మ‌నో గొంతులో ‘రెట్రో’ రుచుల్ని పంచిన మాట ఇది. ఈమ‌ధ్య మ‌నో గొంతు తెలుగులో వినిపించం లేదు. దాంతో పాట‌కు ఓ ఫ్రెష్‌నెస్ వ‌చ్చింది. దానికి తోడు.. రిథ‌మ్‌, కోర‌స్ అంతా ఆనాటి సంగీత ప‌రిమ‌ళాల్ని మ‌ళ్లీ ప‌రిచ‌యం చేశాయి.
ఈరోజే ఎంజాయ్ చేయ్‌, రేప‌టి గురించి ఆలోచించ‌కు – అనే హీరో ఫిలాస‌ఫీని ఈ పాట‌లో ప‌రిచ‌యం చేశారు. వ‌రుణ్‌తేజ్ కూడా ఎన‌ర్జిటిక్‌గా క‌నిపించాడు. తెలుగుతోపాటు హిందీ, క‌న్న‌డ, త‌మిళ, మ‌ల‌యాళ భాష‌ల్లో ఈ చిత్రాన్ని ఒకేసారి విడుద‌ల చేస్తున్నారు. వ‌రుణ్ కెరీర్‌లోనే భారీ బ‌డ్జెట్ తో రూపొందిస్తున్న చిత్ర‌మిది. మీనాక్షి చౌద‌రి, నౌరా ఫ‌త్రీ క‌థానాయిక‌లుగా న‌టిస్తున్నారు. షూటింగ్ పూర్త‌య్యింది. ప్ర‌స్తుతం నిర్మాణానంత‌ర కార్య‌క్ర‌మాలు జ‌రుగుతున్నాయి.
