జన్వాడలోని కేటీఆర్ బావమరిది రాజ్ పాకాల ఫామ్ హౌస్‌లో జరిగిన పార్టీలో కేటీఆర్ భార్య శైలిమ ఉన్నట్లుగా బిగ్ టీవీతో పాటు టీవీ చానళ్లు ప్రకటించాయి. ఫామ్ హౌస్‌లో పెద్ద ఎత్తున శబ్దాలు వస్తూండటంతో స్థానికులకు 100కు కాల్ చేసి సమాచారం ఇచ్చారు. పోలీసులు రెయిడ్ చేశాయి. పెద్ద ఎత్తున అనుమతి లేని విదేశీ లిక్కర్ దొరకడంతో పాటు డ్రగ్స్ టెస్టుల్లో విజయ్ మద్దూరి అనే వ్యక్తికి పాజిటివ్ రావడంతో కలకలం రేగింది. జరిగింది మద్యం పార్టీనా.. డ్రగ్స్ పార్టీనా అన్నదానిపై పోలీసులు వివరాలు సేకరిస్తున్నారు.
పార్టీలో పాల్గొన్న వారంతా హై ప్రోఫైల్ వ్యక్తులే. అంతా రాజ్ పాకాలకు సన్నిహితులేనని చెబుతున్నారు. కేటీఆర్ భార్య శైలిమ కూడా ఈ పార్టీకి హాజరైనట్లుగా పలు టీవీ చానళ్లు ధృవీకరిస్తూ ఉండటంతో రాజకీయంగా సంచలనంగా మారే అవకాశాలు కనిపిస్తున్నాయి. ఫామ్ హౌస్‌లో మరోసారి సోదాలు నిర్వహించి … మరికొంత మందిపై కేసులు నమోదు చేసే అవకాశాలు ఉన్నాయి. ఇప్పటి వరకూ డ్రగ్స్ పాజిటివ్ గా తేలిన విజయ్ మద్దూరిపై మాత్రమే కేసు నమోదు చేశారు.
ఫామ్ హౌస్‌లో పార్టీలు చేసుకోవడం తప్పు కాదు కానీ.. ఇలా అనుమతి లేని మద్యంతో చేసుకోవడం వల్ల చిక్కులు వచ్చి పడే అవకాశాలు ఉన్నాయి. ఒకరికి డ్రగ్స్ పాజిటివ్ రావడంతో పార్టీలో కూడా డ్రగ్స్ సరఫరా చేశారన్న అనుమానాలు పోలీసులకు కలగడానికి కారణం అయింది.
