ప్రేక్ష‌కుల్ని థియేట‌ర్ల‌కు ర‌ప్పించ‌డం అనేది చిన్న సినిమాల‌కు పెద్ద టాస్క్‌. కంటెంట్ తో వాళ్ల‌ని మెస్మ‌రైజ్ చేయ‌డం మిన‌హా మరో మార్గం లేదు. ఆ కంటెంట్ ఎలాంటిదో తెలియాలంటే టీజ‌ర్‌, ట్రైల‌ర్ల‌తో క‌ట్టిప‌డేయాల్సిందే. ఇప్పుడు పెద్ద సినిమాల‌కంటే చిన్న సినిమాల‌కే ట్రైల‌ర్ క‌ట్ చాలా ముఖ్యం. ట్రైల‌ర్ చూసి, సినిమాలో ద‌మ్మెంతో ఓ అవ‌గాహ‌న‌కు వ‌స్తున్నారు. ఇలాంటి నేప‌థ్యంలో ఓ చిన్న సినిమా ట్రైల‌ర్ తో ఆక‌ట్టుకొంటోంది. అదే.. ‘ర‌హ‌స్యం ఇదం జ‌గ‌త్‌’. టైటిల్ కి త‌గ్గ‌ట్టుగానే క‌థ‌లో మిస్టీరియ‌స్ అంశాల్ని జోడించారు. ఆత్మ‌లు, దైవ శ‌క్తి, దుష్ట శ‌క్తి, కాలంతో ప్ర‌యాణం.. ఇలాంటి అంశాల్ని ఈ క‌థ‌లో మేళ‌వించారు.

రాకేష్ గ‌లేబీ, స్ర‌వంతి ప్ర‌త్తిపాటి, మాన‌స వీణ‌, భార్గ‌వ్ గోపినాథం ప్ర‌ధాన పాత్ర‌లు పోషించిన చిత్ర‌మిది. గోమ‌ల్ ఆర్‌.భ‌ర‌ద్వాజ్ ద‌ర్శ‌కుడు. ఈరోజు ట్రైల‌ర్‌ను ప్ర‌ముఖ ద‌ర్శ‌కుడు చందూ మొండేటి ఆవిష్క‌రించారు. న‌వంబ‌రు 8న ఈ చిత్రాన్ని విడుద‌ల చేస్తున్నారు. ట్రైల‌ర్ ఆస‌క్తిక‌రంగా సాగింది. క‌థ‌లోని మిస్టీరియ‌స్ అంశాల్ని కొద్ది కొద్దిగా రివీల్ చేస్తూ… సినిమా చూడాల‌న్న కుతూహ‌లం పెంచారు. న‌టీన‌టులంతా కొత్తవారే. విదేశాల్లో ఎక్కువ షూటింగ్ జ‌రిపారు. దాంతో… స్క్రీన్‌పై ఫ్రెష్ నెస్ క‌నిపించింది. అది సినిమా క‌థలోనూ ఉందో, లేదో తెలియాలంటే ఇంకొన్ని రోజులు ఆగాలి.