‘గేమ్ ఛేంజ‌ర్‌’కు సంబంధించి మెగా ఫ్యాన్స్ చాలా విష‌యాల్లో అసంతృప్తితో ఉన్నారు. ఈ సినిమాకు సంబంధించిన అప్‌డేట్లు స‌రిగా రావ‌డం లేదు. పైగా విడుద‌ల తేదీ వాయిదా ప‌డుతూ వెళ్తోంది. డిసెంబ‌రు 20న వ‌స్తుంద‌న్నారు. చివ‌రికి సంక్రాంతికి షిఫ్ట్ అయ్యింది. ఈలోగా పండ‌గ‌లొచ్చినా, పుట్టిన రోజులు వ‌చ్చినా ఎలాంటి అప్‌డేట్లూ లేవు. దీపావ‌ళికి గేమ్ ఛేంజ‌ర్ నుంచి ఓ అప్‌డేట్ ఆశించారు ఫ్యాన్స్‌. కానీ ఆ అలికిడి లేదు.

అయితే ‘గేమ్ ఛేంజ‌ర్‌’కు సంబంధించిన టీజ‌ర్ రెడీ అయ్యింద‌న్న‌ది ఇన్ సైడ్ వ‌ర్గాల టాక్‌. న‌వంబ‌రు 4న ఈ టీజ‌ర్‌ని విడుద‌ల చేసే ఆలోచ‌న‌లో ఉంది చిత్ర‌బృందం. అందుకోసం ఓ ఈవెంట్ కూడా ప్లాన్ చేయాల‌ని చూస్తోంది. ‘గేమ్ ఛేంజ‌ర్‌’కు సంబంధించిన మొద‌టి ఈవెంట్ ఇదే అవుతుంది. ఈ సినిమా నుంచి మ‌రో 4 పాట‌లూ, ఓ ట్రైల‌ర్ రావాలి. ప‌దిహేను రోజుల‌కు ఓ అప్ డేట్ ఇచ్చుకొంటూ వెళ్లినా, విడుద‌ల నాటికి ఆ ప‌ని పూర్త‌వుతుంది. కాక‌పోతే ఇక్క‌డ ఓ చిక్కువుంది. ద‌ర్శ‌కుడు శంక‌ర్‌కు ఏదీ ఓ ప‌ట్టాన న‌చ్చ‌దు. ఇప్ప‌టికే టీజ‌ర్ కు 4 వెర్ష‌న్లు క‌ట్ చేయించార‌ని తెలుస్తోంది. ఇప్పుడు విడుద‌ల చేయ‌బోయేది 4వ వెర్ష‌న్‌. ఇది కూడా ఫైన‌ల్ చేసిన‌ట్టా, లేదంటే మ‌రో వెర్ష‌న్ క‌ట్ చేయిస్తారా? అనేది అనుమానం. ఇదే ఫైన‌ల్ అయితే న‌వంబ‌రు మొద‌టి వారంలో టీజ‌ర్ రావ‌డం ఖాయం. ఇంకా బెట‌ర్ వెర్ష‌న్ కావాల‌నుకొంటే ఇంకొంత ఆల‌స్యం అవుతుంది. కైరా అద్వాణీ క‌థానాయిక‌గా న‌టించిన ఈ చిత్రానికి త‌మ‌న్ సంగీతం అందించిన సంగ‌తి తెలిసిందే. ఇప్ప‌టి వ‌ర‌కూ ఈ చిత్రం నుంచి రెండు పాట‌లు బ‌య‌ట‌కు వ‌చ్చాయి.