ర‌విబాబు ఓ సాహ‌సోపేత‌మైన సినిమా తీస్తున్నాడ‌న్న సంగ‌తిని తెలుగు 360. కామ్ నిన్న‌నే చెప్పింది. ఆ సాహ‌సం ఏంట‌న్న‌ది ఈరోజు రివీల్ అయ్యింది. ర‌విబాబు ఓ పంది పిల్ల‌తో సినిమా తీస్తున్నాడు. షూటింగ్ కూడా ఆల్రెడీ పూర్త‌యిపోయింది. ఓ కొత్త హీరో, ఓ కొత్త హీరోయిన్ న‌టిస్తున్నా… కాన్సెప్ట్ అంతా పంది పిల్ల చుట్టూనే తిరుగుతుంద‌ట‌. ఈగ సినిమా ఈగ చుట్టూ తిరిగిన‌ట్టు. జురాసిక్ పార్క్ సినిమాకి వాడిన టెక్నాల‌జీని ఈ సినిమా కోసం ఉప‌యోగించామ‌ని ర‌విబాబు చెబుతున్నాడు.

పందిపిల్ల‌తో సినిమా ఏంటండి బాబూ అని అడిగితే.. ”ఏ జంతువైనా చిన్న‌ప్పుడు చాలా బుజ్జిగా ఉంటుంది. పంది కూడా అంతే క్యూట్ గా క‌నిపించింది. అంద‌రూ కుక్క‌ల‌తో, పిల్లుల‌తో, కోతుల‌తో సినిమాలు తీశారు. అందుకే వెరైటీగా ఉంటుంద‌ని పంది పిల్ల‌తో సినిమా తీశా” అంటున్నాడు ర‌విబాబు. మూడు నెల‌ల క్రిత‌మే షూటింగ్ ప్రారంభ‌మై, ఇప్ప‌టికి పూర్త‌యింద‌ట‌. రెగ్యుల‌ర్ క‌మ‌ర్షియ‌ల్ సినిమాలో ఉండే అంశాల‌న్నీ ఇందులో ఉంటాయ‌న‌ని, కాక‌పోతే… పంది పిల్ల మాత్రం సెంట్రాఫ్ ఎట్రాక్ష‌న్ అని అంటున్నాడు. మ‌రి ఈ ప్ర‌యోగం ఎంత వ‌ర‌కూ స‌క్సెస్ అవుతుందో చూడాలి.