ప్ర‌భాస్ – మారుతి కాంబోలో రూపుదిద్దుకొంటున్న సినిమా ‘రాజాసాబ్‌’. ప్ర‌భాస్ ప్ర‌స్తుతం ఈ సినిమాకే త‌న డేట్లు కేటాయిస్తున్నారు. 2025 ఏప్రిల్ 10న ఈ చిత్రాన్ని విడుద‌ల చేస్తారు. హార‌ర్‌, కామెడీ జోన‌ర్‌లో సాగే క‌థ ఇది. ఇటీవ‌ల విడుద‌ల చేసిన గ్లింప్స్‌కి మంచి స్పంద‌న వ‌చ్చింది. త‌మ‌న్ ఈ చిత్రానికి సంగీతాన్ని అందిస్తున్నారు. ఈ సినిమాలో మొత్తంగా ఆరు పాట‌లు ఉంటాయని, అందులో ఓ పాట రీమిక్స్ అని త‌మ‌న్ స్వ‌యంగా ప్ర‌కటించారు. రాజా సాబ్ లో ఓ రీమిక్స్ పాట వినిపించ‌బోతోంద‌ని తెలుగు 360 ముందే చెప్పింది. ఇప్పుడు త‌మ‌న్ మాట‌లతో అది నిజ‌మైంది.

ఇప్పుడు ఆ రీమిక్స్ పాట ఏమిట‌న్న విష‌యంలో టాలీవుడ్ లో ముఖ్యంగా ప్ర‌భాస్ అభిమానుల మ‌ధ్య పెద్ద ఎత్తున చ‌ర్చ న‌డుస్తోంది. ప్ర‌భాస్ పాత సినిమాల్లో పాట‌ని, లేదంటే కృష్ణంరాజు సినిమాలో పాట‌ని రీమిక్స్ చేస్తార‌న్న ప్ర‌చారం జ‌రుగుతోంది. కృష్ణంరాజు పాట‌ల్ని ప్ర‌భాస్ ఎప్పుడూ రీమిక్స్ చేయ‌లేదు. చేస్తే కొత్త‌గానే ఉంటుంది. కానీ మారుతి ఆలోచ‌న‌లు వేరేలా ఉన్నాయి. ఆయ‌న ఈసారి ఓల్డ్ బాలీవుడ్ క్లాసిక్ ని రీమిక్స్ చేస్తున్నారని టాక్‌. ‘ఇన్ సాఫ్ అప్‌నే ల‌హోసే’ (1994) అనే చిత్రంలోని ‘హ‌వా… హ‌వా’ అనే పాట హ‌క్కుల్ని `రాజాసాబ్‌` బృందం చేజిక్కించుకొంద‌ని తెలుస్తోంది. మంచి మాస్ బీట్ ఉన్న పాట ఇది. అప్ప‌ట్లో ఈ పాట ఓ సంచ‌ల‌నం. ఇప్పుడు ఈ పాట‌ని మ‌ళ్లీ వినిపించి, థియేట‌ర్లో ఆ మ్యాజిక్ తీసుకురావాల‌నుకొంటున్నారు. ఈ పాట కోసం దాదాపు రూ.2 కోట్ల వ‌ర‌కూ ఖ‌ర్చు చేశార‌ని టాక్‌. సినిమాలో ఈపాట చాలా కీల‌క‌మైన స‌మ‌యంలో వ‌స్తుంద‌ని, థియేట‌ర్ మొత్తం షేకైపోయేలా ఈ పాట‌ని తీర్చిదిద్ద‌నున్నార‌ని తెలుస్తోంది. ప్ర‌భాస్ డాన్సులు చేసి చాలాకాలం అయ్యింది. ప్ర‌భాస్ స్టెప్పులు చూడాల‌ని ఫ్యాన్స్ కూడా చాలాకాలంగా ఎదురుచూస్తున్నారు. వాళ్ల కోరిక ‘రాజాసాబ్‌’తో తీరబోతోంది.