రాజ‌మౌళి సినిమా ప్రిప‌రేష‌న్ల‌లో ఉన్నాడు మ‌హేష్ బాబు. 2025 సంక్రాంతి త‌ర‌వాత ఈ సినిమా సెట్స్ పైకి వెళ్తుంది. ఈలోగా మ‌హేష్ గెట‌ప్ పై దృష్టి పెట్టాడు. ఈ సినిమా కోసం మ‌హేష్ గెడ్డం పెంచాడు. పొడ‌వాటి జుత్తు తో క‌నిపిస్తున్నాడు. ఈమ‌ధ్య మ‌హేష్ ఎక్క‌డికి వ‌చ్చినా ఇదే లుక్‌. మ‌హేష్ ఇంత గెడ్డం, జుత్తు పెంచ‌డం ఇదే తొలిసారి. రాజ‌మౌళి సినిమా మొత్తం ఇదే లుక్ కొన‌సాగిస్తాడ‌ని ఫ్యాన్స్ భావించారు. అయితే.. ఇప్పుడు స‌డ‌న్ గా మ‌హేష్ లుక్ మారింది. గెడ్డం ట్రిమ్ చేశాడు. జుత్తు కూడా త‌గ్గించేశాడు. ఆదివారం ఓ ప్రైవేటు ఫంక్ష‌న్‌కి హాజ‌ర‌య్యాడు మ‌హేష్. ఈ సంద‌ర్భంగా కొత్త లుక్‌లో ద‌ర్శ‌మినమిచ్చాడు. దాంతో ఫ్యాన్స్ క‌న్‌ఫ్యూజ్ అవుతున్నారు. రాజ‌మౌళి సినిమా కోసం పెంచిన గెడ్డం, జుత్తూ ఏమ‌య్యాయ‌న్న‌ది వాళ్ల ప్ర‌శ్న‌. సినిమా షూటింగ్ ఇంకా మొద‌లు కాలేదు. ఈలోగా మ‌హేష్ గెట‌ప్ ఛేంజ్ చేయ‌డం ఆశ్చ‌ర్య‌క‌ర‌మైన ప‌రిణామ‌మే.

అయితే ఈ లుక్ మార్పుకి ఓకార‌ణం ఉంది. ఇటీవ‌ల మ‌హేష్ పై లుక్ టెస్ట్ చేశాడు రాజ‌మౌళి. కొంత‌మేర ట్రైల్ షూట్ కూడా జ‌రిగింద‌ని స‌మాచారం. ఆ ట్రైల్ షూట్ కోస‌మే మ‌హేష్ జుత్తు పెంచాడ‌ని చెబుతున్నారు. ఇప్పుడు ఈ లుక్‌లో మ‌రోసారి ట్రైల్ షూట్ జ‌రుగుతుంది. ఈ రెండు గెట‌ప్పుల్లో ఏది బాగుంటే… దాన్ని కంటిన్యూ చేస్తారు. ఎలాగూ షూటింగ్‌కు టైమ్ ఉంది కాబ‌ట్టి, ఈలోగా మ‌హేష్ త‌న లుక్ ని మ‌రోసారి మార్చుకొనే అవ‌కాశం ఉంది. ఈ సినిమా కోసం వార‌ణాసి సెట్ ని తీర్చిదిద్దుతున్నార‌ని టాక్‌. హైద‌రాబాద్ శివార్ల‌లో ఇందుకోసం ఓ భారీ సెట్ రూపొందిస్తున్నారు. షూటింగ్ లో స‌గ భాగం ఇక్క‌డే జ‌రిగే అవ‌కాశం ఉంది.