దొంగతనం చేసేవాళ్లకు ఏదైతేనేం. ప్రతిసారీ డబ్బూ దస్కం బంగారం దొరకవు కదా. అమెరికాలో ఓ వెరైటీ దొంగతనం జరిగింది. భారీగా చీజ్ లోడ్ ఉన్న ట్రక్కు దొంగలపాలైంది. సదరు దొంగలు చీజ్ ను దొంగతనం చేయడం ఆశ్చర్యం కలిగించింది. ఏదో చీజ్ కదా అని తేలిగ్గా తీసిపారేయకండి. దీని విలువ దాదాపు 46 వేల డాలర్లు. చీజ్ తో పాటు ట్రక్కు కూడా దొంగలపాలైంది.
విస్కాన్సిన్ లోని ఓక్ క్రీక్ లో ఈ వెరైటీ చోరీ జరిగింది. పార్కింగ్ లాట్ లో ఉంచిన చీజ్ లారీ కనిపించడం లేదని డ్రయివర్ ఫిర్యాదు చేశాడు. ఈ ప్రాంతంలో చీజ్ దొంగల పాలు కావడం ఇదే మొదటిసారి కాదట. అంటే మాంచి చీజ్ లోడ్ వెళ్తుంటే వాసన చూసి పట్టేస్తారో లేక మరో విధంగా సమాచారం తెలుసుకుంటారో గానీ ఈ వెరైటీ దొంగలు భలే చోరీలు చేస్తున్నారు.
చీజ్ ను దొంగిలించడం ఓ వేలం వెర్రి అని ఓ చీజ్ వ్యాపారి వ్యాఖ్యానించాడు. ఈ దొంగల వల్ల తమ చీజ్ లోడ్ భద్రంగా గమ్యం చేరుతుందనే నమ్మకం లేకుండా పోయిందన్నాడు. ఇంతకీ ఈ దొంగలు చీజ్ ను అమ్ముకుంటున్నారో లేక తామే ఉపయోగిస్తున్నారో తెలియదు. మొత్తానికి ఓ పెద్ద గ్యాంగే ఉన్నట్టుందని చీజ్ వ్యాపారులు అనుమానిస్తున్నారు. దొంగల కోసం పోలీసులు గాలిస్తున్నారు.
