హీరోల్ని కొత్త‌గా, మాసీగా చూపించ‌డంలో పూరి జ‌గ‌న్నాథ్ స్టైల్ డిఫ‌రెంట్ అనే చెప్పాలి. అప్ప‌టి వ‌ర‌కూ క‌థానాయ‌కుడు ఒక‌లా క‌నిపిస్తాడు.. పూరి ఫ్రేములో మ‌రోలా ద‌ర్శ‌న మిస్తాడు. ఇప్పుడు క‌ల్యాణ్ రామ్ కూడా అంతే. వీరిద్ద‌రి కాంబినేష‌న్లో ఓ చిత్రం తెర‌కెక్కుతోంది. ఈ సినిమాకి ఇజం అనే పేరు ఖ‌రారు చేశారు. ఫ‌స్ట్ లుక్ పోస్ట‌ర్‌నీ విడుద‌ల చేశారు. నోట్లో బీడీ పెట్టుకొన్న క‌ల్యాణ్ రామ్ ఫొటో.. నంద‌మూరి అభిమానుల‌కు తెగ న‌చ్చేస్తోంది. క‌ల్యాణ్‌రామ్‌ని ఇంత మాసీగా ఎప్పుడూ చూళ్లేదంటూ.. అత‌ని అభిమానులు చెబుతున్నారు. ”యుకెన్ అరెస్ట్ దిస్ గ‌య్‌.. బ‌ట్ కెనాట్ అరెస్ట్ హిస్ ఐడియా” అనే ట్యాగ్ లైన్‌తో ప్రేక్ష‌కుల్ని అరెస్ట్ చేసేశాడు పూరి జ‌గ‌న్నాథ్‌. ఇజం అనే లోగో… క్యాప్ష‌న్‌, క‌ల్యాణ్ రామ్ లుక్ ఇవ‌న్నీ అరెస్టింగ్ గా అనిపిస్తున్నాయి. క‌ల్యాణ్ రామ్ కూడా ‘ఇప్ప‌టి వ‌ర‌కూ నేను చేసిన సినిమాలు ఒక ఎత్తు. ఈ సినిమా మ‌రో ఎత్తు’ అంటున్నాడు. అన్న‌ట్టు ‘ఇజం’ రిలీజ్ డేట్ కూడా చెప్పేశారు. సెప్టెంబ‌రు 29న ఈ చిత్రాన్ని ప్రేక్ష‌కుల ముందుకు తీసుకొస్తారు. జ‌గ‌ప‌తిబాబు కీల‌క పాత్ర పోషిస్తున్న ఈ చిత్రానికి అనూప్ సంగీతం అందిస్తున్నాడు.