‘బాహుబలి’ విజయాన్ని చాలా ఎంజాయ్ చేస్తూ.. ఈ సినిమా పార్టు టూ కోసం ఎంతో ఈగర్ గా వెయిట్ చేస్తున్న ప్రభాస్ అభిమానులను ఒక విషయం మాత్రం చాలా అసంతృప్తికి గురి చేస్తోంది. ఈ విషయంలో వాళ్లు ఆల్ మోస్ట్ రగిలిపోతున్నారు! తమ అభిమాన హీరోకి అవార్డుల విషయంలో అన్యాయం జరగడమే వారి అసంతృప్తికి కారణం! ఒకవైపు జాతీయ అవార్డుల దగ్గర నుంచి సౌతిండియన్ ఫిల్మ్ ఫేర్, ఇతర టీవీ ఛానళ్ల అవార్డులు తదితరాలన్నింటి.. అవార్డుల కార్యక్రమంలోనూ బాహుబలి ఉనికి చాటుతున్నా, ఎటొచ్చీ ప్రభాస్ కే ఎక్కడా ఒక్క అవార్డు దక్కిన దాఖలాలు లేవు!
బాహుబలికి చాలా కేటగిరిల్లో అవార్డులు దక్కుతున్నాయి. ఉత్తమ సినిమా అవార్డు చాలా చోట్ల దక్కింది. అలాగే ఇందులో నటించిన.. రాణా దగ్గర , సత్యరాజ్ , రమ్యకృష్ణ, అనుష్క.. వీళ్లందరికీ తమ తమ విభాగాల్లో అవార్డులు దక్కుతూనే ఉన్నాయి. అయితే ఎట్టొచ్చీ ఉత్తమ కథనాయకుడు, ఉత్తమ నటుడు విభాగంలో ప్రభాస్ కే ఒక్క చోటా అవార్డు దక్కలేదు.
అవార్డుల ఫంక్షన్ లోనూ ఈ విభాగంలో ప్రిన్స్ మహేశ్ బాబు అవార్డును సొంతం చేసుకొంటూ వస్తున్నాడు!
అన్నీ అవార్డులూ బాహుబలికేనా.. గత ఏడాదిలో మంచి హిట్ అయిన శ్రీమంతుడు సినిమాకూ న్యాయం చేయాలన్నట్టుగా ఈ అవార్డుల పంపకం జరుగుతున్నట్టుంది. బాహుబలి ని కాదని, శ్రీమంతుడుకి ఉత్తమ చిత్రం అవార్డును ఇవ్వలేక.. మహేశ్ కు ఉత్తమ అవార్డును ఇస్తూ శ్రీమంతుడికి న్యాయం చేస్తున్నారు అవార్డులు ఇచ్చేవాళ్లు. వీరు ప్రదర్శించే ఇలాంటి లౌక్యమే ప్రభాస్ కు ఎక్కడా అవార్డును దక్కనీయడం లేదు. ప్రతిచోటా ఇదే జరుగుతుండటంతో.. ప్రభాస్ ఫ్యాన్స్ అసహనం వ్యక్తం చేస్తున్నారు. ప్రభాస్ ప్రతిభ ముందు ఈ అవార్డులు ఎందుకూ పనికిరావని అనేస్తున్నారు.
