చిరంజీవి క‌త్తిలాంటోడు సినిమా గురించిన మ‌రో ఆస‌క్తిక‌ర‌మైన వార్త టాలీవుడ్‌లోచ‌క్క‌ర్లు తిరుగుతోంది. ఒక‌ప్ప‌టి చిరు సూప‌ర్ జోడీ విజ‌య శాంతి ఈ సినిమాలో ఓ కీ రోల్ చేస్తున్న‌ట్టు గుస‌గుస‌లాడుకొంటున్నారు. నిజంగా విజ‌య‌శాంతి ఈ సినిమాలో న‌టిస్తే… అది నిజంగానే చిరు సినిమాకి స‌రికొత్త క్రేజ్ తీసుకొస్తుంద‌న‌డంలో ఎలాంటి సందేహం లేదు. అయితే.. క‌త్తి త‌మిళ వెర్ష‌న్ చూసిన‌వాళ్లంద‌రికీ ఒక‌టే అనుమానం క‌లుగుతోంది. మాతృక‌లో విజ‌య‌శాంతి స్ట్రేచ‌ర్‌కి త‌గిన పాత్రేం లేదు. అలాంట‌ప్పుడు రీమేక్‌లో ఎక్క‌డ్నుంచి వ‌చ్చింద‌న్న‌దే పెద్ద అనుమానం. విజ‌య‌శాంతి కోసం ఓ పాత్ర‌ని కావాల‌ని క‌ల్పించారా? లేదంటే ఇది త‌ప్పుడు న్యూసా?? అనేది ఆస‌క్తిక‌రంగా మారింది.

గ‌తంలో విజ‌య‌శాంతికి చాలా అవ‌కాశాలొచ్చాయి. కానీ రాజకీయాల‌తో బిజీగా ఉండ‌డం వ‌ల్ల దేనికీ ఒప్పుకోలేదు. ఒసేయ్ రాములమ్మ‌కి కొన‌సాగింపుగా విజ‌య‌శాంతిపై ఓ సినిమా చేయాల‌ని గ‌త యేడాదిగా ప్ర‌య‌త్నాలు జ‌రుగుతున్నాయి. ఆ సినిమా చేయ‌డానికే విజ‌య‌శాంతి తెగ ఆలోచించి చివ‌రికి నో చెప్పింది. అలాంటిది ఓ చిన్న పాత్ర కోసం… మ‌ళ్లీ మేక‌ప్ వేసుకోవ‌డానికి సిద్ధ‌ప‌డుతుందా? అదీ.. ద‌శాబ్ద‌కాలంగా అంటీముట్ట‌న‌ట్టు ఉంటున్న చిరంజీవితో అన్న‌ది అనుమాన‌మే. ఇది కేవ‌లం పుకారేన‌ని.. ఇందులో నిజం లేద‌ని టాలీవుడ్ వ‌ర్గాలు అంటున్నాయి. అయితే ఇటీవ‌ల మెగా కాంపౌండ్ నుంచి కొంత‌మంది విజ‌య‌శాంతిని క‌లిశార‌ని… అది చిరు 150వ సినిమా కోస‌మే అన్న‌ది ఇంకొంద‌రి వాద‌న‌. మరి ఏం
జ‌రుగుతుందో చూడాలి.