అల్లుడితో ఓ భారీ సినిమా తీయాల‌ని ప్లాన్ చేస్తున్నాడు స్టార్ ప్రొడ్యూస‌ర్ అశ్వ‌నీద‌త్‌. ఎవ‌డే సుబ్ర‌మ‌ణ్యంతో దర్శ‌కుడిగా నిరూపించుకొన్న నాగ అశ్విన్‌… అశ్వ‌నీద‌త్ మామా అల్లుళ్ల‌న్న సంగ‌తి తెలిసిందే. నాగ్ అశ్విన్ రెండో ప్రాజెక్టు కోసం నెల రోజులుగా సుదీర్ఘ‌మైన ప్ర‌య‌త్నాలు జ‌రుగుతున్నాయి. ‘సావిత్రి’ బ‌యోపిక్ ఆధారంగా తెర‌కెక్కించే సినిమా ఇది. సావిత్రి పాత్ర కోసం చాలామంది పేర్లు ప‌రిశీలించారు. ఈ సినిమాని బాలీవుడ్‌స్థాయిలో తీయాల‌న్న‌ది అశ్వ‌నీద‌త్ ప్లాన్‌. అందుకే అక్క‌డి నుంచి క‌థానాయిక‌ల్ని దిగుమ‌తి చేయాల‌ని చూస్తున్నారు. సావిత్రిగా మొద‌టి ఆప్ష‌న్‌.. విద్యాబాల‌న్‌. సావిత్రి స్టేచ‌ర్‌కి, సావిత్రి రూపానికి విద్యాబాల‌న్ అయితే స‌రిపోతుంద‌ని అశ్వ‌నీద‌త్ భావిస్తున్నార‌ట‌. విద్య ఓకే అంటే ఈసినిమాకి బాలీవుడ్ స్థాయిలో గుర్తింపు వ‌స్తుంద‌ని, మార్కెట్ కూడా బాగా జ‌రుగుతుంద‌ని న‌మ్మ‌కం. అయితే విద్యాబాల‌న్ మాత్రం రూ.4 కోట్ల పారితోషికం డిమాండ్ చేస్తున్న‌ట్టు స‌మాచారం. దాంతో పాటు షూటింగ్ ఎక్క‌డ చేయాలి? అనే విష‌యాల‌పైనా కొన్ని సూచ‌న‌లు చేసింద‌ట‌. ఆమె డిమాండ్ల లిస్టు పెద్ద‌దే ఉంద‌ని టాక్‌. అయినా స‌రే.. ఈ సినిమాని విద్యాబాల‌న్‌తోనే తెర‌కెక్కించాల‌ని చిత్ర‌బృందం భావిస్తోంద‌ని స‌మాచారం. రెండు మూడు వారాల్లో సావిత్రికి సంబంధించిన అధికారిక ప్ర‌క‌ట‌న వైజ‌యంతీ మూవీస్ ప్రొడ‌క్ష‌న్ హౌస్ నుంచి వెలువ‌డే అవ‌కాశం ఉంది.