ఇంద్ర‌, ఠాగూర్‌. స్టాలిన్‌.. ఇలా ప‌వ‌ర్‌ఫుల్ టైటిల్స్‌తో అభిమానుల్ని అల‌రించాడు చిరంజీవి. ఇప్పుడు నెపోలియ‌న్‌గా మార‌బోతున్నాడా? అవుననే అంటున్నాయి టాలీవుడ్ వ‌ర్గాలు. చిరంజీవి 150వ చిత్రానికి నెపోలియ‌న్ అనే పేరు ప‌రిశీలిస్తున్నార్ట‌. ఇది వ‌ర‌కు క‌త్తిలాంటోడు అనే పేరు ప్రచారంలోకి వ‌చ్చింది. డాడీ సినిమా పేరు అదేం కాద‌ని చ‌ర‌ణ్ కూడా క్లారిటీ ఇచ్చాడు. ఆ త‌ర‌వాత ఖైదీ నెం.150 అనే టైటిల్ బ‌య‌ట‌కు వ‌చ్చింది. ఇప్పుడు నెపోలియ‌న్ అనే పేరు వినిపిస్తోంది. ఇప్ప‌టి వ‌ర‌కూ వ‌చ్చిన టైటిళ్ల‌తో పోలిస్తే.. నెపోలియ‌న్ బెట‌ర్‌గా క‌నిపిస్తోంది. సో… దీన్నే ఫిక్స్ చేసే అవ‌కాశాలున్నాయి. టైటిల్ ఏంట‌న్న‌ది చిరంజీవి పుట్టిన రోజు సంద‌ర్భంగా ఆగ‌స్టు 22నే అధికారికంగా ధృవీక‌రిస్తారు.

ప్ర‌స్తుతం హైద‌రాబాద్ శివారు ప్రాంతాల్లో షూటింగ్ జ‌రుగుతోంది. చిరంజీవి, ఇత‌ర ప్ర‌ధాన తారాగ‌ణంపై కీల‌క స‌న్నివేశాల్ని తెర‌కెక్కిస్తున్నారు. పుట్టిన రోజు లోపుగా ఈ సినిమాకి సంబంధించిన తొలి టీజ‌ర్ రిలీజ్ చేస్తే ఎలా ఉంటుంది? అని చిత్ర‌బృందం ఆలోచిస్తోంద‌ట‌. ఆల్రెడీ టీజ‌ర్‌ని క‌ట్ చేశార‌ని కూడా చెప్పుకొంటున్నారు. ఈ విష‌యంలో చిరు ఓ నిర్ణ‌యం తీసుకోవాల్సివుంద‌ని వినికిడి.

గమనిక : నెపోలియన్ పోస్టర్ అధికారిక నిర్ధారణ కాదు