జంథ్యాల సూప‌ర్ హిట్ చిత్రాల్లో శ్రీ‌వారికి ప్రేమ‌లేఖ ఒక‌టి. ఉషాకిర‌ణ్ మూవీస్ నుంచి వ‌చ్చిన ఈ సినిమా.. ఆ బ్యాన‌ర్ ఖ్యాతిని ఒక్క‌సారిగా వంద మెట్లు పైకెక్కించింది. జంథ్యాల మార్కు కామెడీ, న‌రేష్ అల్ల‌రి.. తొలి సారి మిమ్మ‌ల్ని చూసింది మొద‌లు… అనే పాట – ఈ సినిమాని ఎప్ప‌టికీ గుర్తుండిపోయేలా తీర్చిదిద్దాయి. ఇప్పుడు ఈ సినిమాకి సీక్వెల్ వ‌స్తోందా? అవున‌నే అంటున్నాయి ఫిల్మ్ న‌గ‌ర్ వ‌ర్గాలు. ఇటీవ‌ల ఫిల్మ్ ఛాంబ‌ర్‌లో ఉషాకిర‌ణ్ మూవీస్ సంస్థ శ్రీ‌వారికి ప్రేమ‌లేఖ 2 అనే టైటిల్‌ని రిజిస్ట‌ర్ చేయించింది కూడా. దాంతో సీక్వెల్ సంగ‌తి బ‌య‌ట‌కు వ‌చ్చింది. ఎప్పుడూ కొత్త‌వాళ్ల‌తో ప్ర‌యోగాలు చేయ‌డం ఆ సంస్థ‌కు అల‌వాటు. ఈసారి కూడా అదే బాట‌లో వెళ్తోంద‌ట. ఈ సినిమాలో అంతా కొత్త‌వారే న‌టించే అవ‌కాశాలున్నాయ‌ని తెలుస్తోంది. స్ర్కిప్టు వ‌ర్క్ పూర్త‌యింద‌ని, త్వ‌ర‌లోనే ఈ సినిమా సెట్స్‌పైకి వెళ్తుంద‌ని తెలుస్తోంది.
అంతా బాగానే ఉంది. కానీ ఒక‌టే డౌటు. అప్ప‌ట్లో అంటే పోస్ట్ డ‌బ్బాల కాలం. కాబ‌ట్టి ప్రేమ‌లేఖ‌ల ఫార్ములా అద్భుతంగా సాగిపోయింది. ఇప్పుడు పోస్ట్ డ‌బ్బాలెక్క‌డ? అన్నీ ఈ మెయిల్‌లోనే. స్మార్ట్ ఫోన్ చుట్టూనే ప్ర‌పంచం తిరుగుతోంది. ఇలాంట‌ప్పుడు ప్రేమ‌లేఖ ల ఫార్ములా వ‌ర్క‌వుట్ అవుతుందా అని. దానికి తోడు జంథ్యాల‌లా కామెడీ పండించే స‌త్తా ఎవ‌రికి ఉంది? ఈ ప్ర‌శ్న‌ల‌కు స‌మాధానం తెలియాలంటే ఇంకొంత కాలం ఆగాల్సిందే.
