రౌడీ త‌ర‌వాత సీరియ‌స్ గానే సినిమాల‌పై దృష్టి పెడుతున్నారు మంచు మోహ‌న్ బాబు. పాండ‌వులు పాండ‌వులు తుమ్మెద‌లో కీల‌క‌పాత్ర చేశారాయ‌న. ఆ త‌ర‌వాత మామ మంచు అల్లుడు కంచు సినిమాతోనూ ఆక‌ట్టుకొన్నారు. ఇప్పుడు మ‌రోసారి వెండితెర‌పై సంద‌డి చేయ‌బోతున్నారు. అయితే ఈసారి కాస్త సీరియ‌స్ వేష‌మే వేస్తున్నార‌ని టాక్‌. మంచు విష్ణు క‌థానాయ‌కుడిగా 24 ఫ్రేమ్స్ ఫ్యాక్ట‌రీ ఓ చిత్రాన్ని నిర్మిస్తోంది. ఈ చిత్రానికి ‘సేనాప‌తి’ అనే పేరు ఖ‌రారు చేశారు. ఇందులో మోహ‌న్ బాబు కూడా ఓ కీల‌క‌మైన పాత్ర పోషిస్తున్నార్ట‌. మాస్‌, క‌మ‌ర్షియ‌ల్ అంశాల‌తో సాగే ఈ చిత్రంలో పొలిటిక‌ల్ ట‌చ్ కూడా ఉంటుంద‌ని టాక్‌. ద‌ర్శ‌కుడు ఎవ‌రు? క‌థానాయ‌క ఎవ‌ర‌న్న విష‌యాలు త్వ‌ర‌లో తెలుస్తాయి. ‘ఈడోర‌కం – ఆడోర‌కం’ లాంటి మాస్ హిట్ త‌ర‌వాత విష్ణు కొత్త‌గా సినిమాలేం ప్రారంభించ‌లేదు. అయితే… వెంట వెంట‌నే రెండు సినిమాల్ని ప‌ట్టాలెక్కించ‌డానికి ప్లాన్ చేస్తున్న‌ట్టు తెలుస్తోంది. అందులో భాగంగానే సేనాప‌తి త్వ‌ర‌లోనే సెట్స్‌పైకి వెళ్ల‌నుంది.